SQO-da 14 myńnan astam oqýshy jazda tegin demalady

SQO Bilim basqarmasynyń basshysy Aınagúl Suraǵanovanyń aıtýynsha, óńirge qarasty 10 lager bar, onyń 7-eýi memlekettik, al úsheýi - senimgerlik basqarýǵa berilgen. Sonymen qatar Aıyrtaý aýdanyndaǵy úsh demalys orny - Aqmola oblysynyń qaramaǵyndaǵy «Sokol», «Chaıka» jáne Týrızm jáne sport mınıstrliginiń balansyndaǵy «Olımpıets» lagerleri de jumys isteıdi.

- Lagerlerdi qabyldaý jumystary 31 mamyrǵa deıin aıaqtalady. 8 maýsymda jumysty bastaımyz dep josparladyq. Ol úshin ortasha táýliktik aýa temperatýrasy bes kún qatarynan +16 gradýstan tómen bolmaýy tıis. Memlekettik lagerlerdegi joldamalardyń ortasha quny 35 myńnan 65 myń teńgege deıin jetedi, - deıdi Aınagúl Suraǵanova.

Basqarma basshysynyń aıtýynsha, oblysta áleýmettik osal topqa jatatyn 14 myńnan astam mektep oqýshysy bar. Olardyń barlyǵy demalyspen tegin qamtylady.

- Joldamaǵa 100 mln teńge jergilikti bıýdjetten, 45,6 mln teńge demeýshiler esebinen, 5,4 mln teńge kásipodaq uıymdarynan bólindi. 1 maýsymnan bastap oblysta mektep janyndaǵy 202 alań jumysyn bastaıdy. Onda 24 myńnan astam oqýshy demalady. Sondaı-aq beıindik alańdar, shatyrly lagerler jáne kıiz úı lagerleri uıymdastyrylady, - deıdi Aınagúl Suraǵanova.

Balalarǵa qaýipsiz ári jaıly demalys uıymdastyrý úshin lagerlerde jóndeý jumystary júrgizilip jatyr. Bıyl bul maqsatqa 235 mln teńge bólingen. Qazirgi ýaqytta «Aıýtas», «Rodnık» jáne «Serebrıanyı bor» lagerlerindegi jóndeý tolyq aıaqtalǵan.

Budan bólek «Baldaýren» respýblıkalyq ortalyǵynda 126 bala demalady. Onyń ishinde 13 aýyl balasy «QH Jazdyq joldama» jobasy arqyly barady.

Al «Bóbek» ortalyǵyna 20 bala joldama alady. Sonymen birge Ýálıhanov aýdanynan 100 oqýshy Aqmola oblysyndaǵy «Chaıka» lagerine jiberiledi.

SQO sanıtarııalyq-epıdemıologııalyq baqylaý departamentiniń málimetinshe, ázirge balalardyń demalys lagerleriniń ekeýi ǵana ruqsat qujatty aldy.

Buǵan deıin balalar lagerlerine biryńǵaı talap engizilgenin jazǵan edik.