SQO-da 14 maman «Belsendi qyzmeti úshin» tósbelgisimen marapattaldy
«Nur Otan» partııasy SQO fılıaly baspasóz qyzmetiniń málimetinshe, «Belsendi qyzmeti úshin» tósbelgisin partııa Tóraǵasynyń Birinshi orynbasary Baýyrjan Baıbektiń atynan medaldardy óńirlik fılıal tóraǵasy, oblys ákimi Qumar Aqsaqalov tapsyrdy. Óńir basshysy saltanatty jıynǵa qatysýshylardy aldaǵy Táýelsizdik kúnimen quttyqtaı otyryp, Elbasy saıasatynyń arqasynda elimiz óziniń biregeı «qazaqstandyq jolymen» ekonomıkalyq ósim men áleýmettik ál-aýqatqa qol jetkizgenin atap ótti.
«30 jyl – tarıh úshin qysqa merzim. Biraq osy kezeńde biz kóp nársege qol jetkizdik. Eń bastysy – qandy kóterilister men qaqtyǵystarsyz. 22 jyl boıy «Nur Otan» partııasy Elbasy men Memleket basshysy bastamalarynyń jolserigi retinde áreket ete otyryp, barlyq aýqymdy reformalardy iske asyrdy», - dedi Qumar Aqsaqalov.
Ol osy kezeńde partııanyń ýaqyt talabyna saı bolý úshin únemi jańaryp otyrǵanyn aıtty. Atap aıtqanda, «Nur Otan» pandemııa kezinde belsendi partııa músheleri men qoǵamdy praımerız arqyly biriktire aldy, partııalyq tizimderdi, máslıhattardaǵy fraktsııalar quramyn jańartty. Ár oblys, qala jáne aýdan úshin praımerız jáne saılaý naýqany kezinde halyqtyń ótinishterinen jınalǵan saılaýaldy baǵdarlamalar jasaldy. Sonymen qatar, partııa músheleri volonterler qozǵalysyn basqaryp, muqtajdarǵa azyq-túlik paketterin jetkizdi.
Marapattalǵandardyń arasynda partııa ardagerleri men belsendileri, «Nur Otan» óńirlik jáne aýmaqtyq fılıaldarynyń qyzmetkerleri bar. Sonymen qatar, birqatar belsendi nurotandyq «Qazaqstan Respýblıkasynyń Táýelsizdigine 30 jyl» merekelik medalimen, «Halyq alǵysy» medalimen jáne «Qurmet» gramotalarmen marapattaldy.
