SQO-da 134 myń zeınetkerdiń 18 paıyzy ǵana koronavırýs ekpesin alǵan
SQO densaýlyq saqtaý basqarmasy basshysynyń orynbasary Qumar Kúsemisovtyń aıtýynsha, óńirde epıdemıologııalyq jaǵdaı kúrdeli. Ótken táýlikte jańadan 159 adam koronavırýs juqtyrǵan.
«SQO-da ınfektsııalyq statsıonarlarda 1600 oryn jáne 115 adamǵa arnalǵan jansaqtaý oryndary bar. Qazirgi ýaqytta 783 adam em alyp jatyr, ınfektsııalyq statsıonarlar 49 %-ǵa tolǵan. 51 syrqat jansaqtaý bólimderinde jatyr, ol 44 %-ǵa júktelgen. Budan basqa 2320 naýqas dárigerlerdiń baqylaýyna alynyp, ambýlatorlyq em alyp jatyr», - deıdi Qumar Kúsemisov.
Dárigerdiń aıtýynsha, «Delta» shtamynyń taralýyna baılanysty koronavırýsty juqtyrǵandarda aýrý aýyr ótip jatyr.
«Statsıonarlyq em alyp jatqandardyń basym bóligi – jasy 60-tan asqandar. ıAǵnı 65%-y egde jastaǵylar. Olardyń, ádette, birneshe ilespe sozylmaly aýrýlary bar. Sondyqtan qater tobyna kiredi. Koronavırýstan aýyryp qaıtys bolǵan 268 adamnyń 78 %-y – 60 jastan asqandar. Bul - 209 adam.
Jastaryna baılanysty olardyń densaýlyqtary nashar, ımmýnıtetteri álsiregen. Sol sebepti qarttarymyzdy, zeınetkerlerdi, tipti, dıspanserlik esepte turǵandardy da, ásirese sozylmaly aýrýlary barlardy ekpe alýǵa shaqyramyn. Sozylmaly aýrýlar vaktsına qoıǵyzýǵa qarsy kórestilim emes. Olar remıssııa ýaqytynda, jaǵdaılary jaqsarǵanda ekpe alýlaryna bolady», - deıdi basqarma basshysynyń orynbasary.
Qumar Kúsemisovtyń aıtýynsha, statsıonarlarda jatqan naýqastardyń 99%-y vaktsınatsııa kýrsynan ótpegender. Olardyń jaǵdaıy aýyr. Ózdiginen dem ala almaıtyndar.
«SQO-da 134 myń zeınetker bolsa, sonyń búgingi tańda tek 18 %-y ǵana ekpe alǵan. Bul – 24 myń adam. Al 110 myń adam áli kúnge deıin vaktsınatsııadan ótpeı, bastaryn qaýip-qaterge tigip otyr. Koronavırýsty juqtyrǵan jaǵdaıda osy qater tobyna jatatyndarda aýrý aýyr ótedi, asqynyp, sońy ólimge aparýy múmkin», - deıdi dáriger.
Buǵan deıin SQO-da ardagerler keńesi halyqty vaktsına alýǵa shaqyryp, úndeý jarııalaǵan edi.
