SQO-da 13 jasar bala granata taýyp aldy
PETROPAVL. QazAqparat – Soltústik Qazaqstan oblysynda anasymen kartop otyrǵyzyp júrgen 13 jastaǵy bala baqshadan eski granata taýyp aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Qyzyljar aýdanyndaǵy aýyldardyń birinde kartop otyrǵyzý úshin jer qazyp júrgen 13 jasar bala tot basqan granataǵa uqsas zat taýyp alǵan. Qasynda júrgen anasyna kórsetip, ol kórshisine aparyp kórsetýge keńes bergen. Er adam qaýipti zatty abaılap jerge qoıyp, birden polıtsııaǵa habarlapty.
Jarylǵysh zatty áketýge mamandar kelgenge deıin, aýdandyq polıtsııa bóliminiń qyzmetkerleri granata jatqan jerdi qorshaýǵa alyp, 500 metrdeı radıýstaǵy úılerdiń turǵyndaryn qaýipsiz jerge evakýatsııalady. Qaýipti zat arnaıy konteınerge ornalastyrylyp, zertteýge jiberildi. Keıin granata áskerı bólimniń polıgonynda joıylady.
«Tabylǵan zattyń granata ekeni anyqtaldy. Bizdiń boljamymyz boıynsha ol Mılls jaryqshaqty granatasy. Mundaı jarylǵysh zat Birinshi Dúnıejúzilik jáne Azamat soǵysynda qoldanylǵan. Syrtyn tot basqan, tańbasy kórinbeıdi. Tutandyrǵyshy bolmaǵanymen, ishindegi zaty qaýipti bolýy múmkin. Sondyqtan osyndaı eski qarý-jaraq tapqanda tıispeı, polıtsııaǵa habar bergen jón», - deıdi Qyzyljar aýdandyq polıtsııa bóliminiń bastyǵy Álıhan Baıqadamov.
