SQO-da 13 myń kásiporynda áıelder jetekshilik etedi
PETROPAVL. QazAqparat – Soltústik Qazaqstan oblysynda áıelder kásipkerligi damyp, búginde ár úshinshi kásiporynda qyz-kelinshekter jetekshilik etedi, dep habarlaıdy QazAqparat tilshisi.
SQO-da Kásipkerler palatasy janynan qurylǵan isker áıelder keńesi «Ósý ýaqyty» atty aımaqaralyq konferentsııa ótkizdi. Maqsaty – tájirıbemen bólisý, óz isin ashqysy kelip júrgenderge úlgi kórsetý. Jıyn aıasynda jas kásipkerler túrli sheberlik saǵattaryna qatysýǵa múmkindik aldy.
«Bizdiń konferentsııa negizinen jas kásipkerlerge arnalǵan. Buryn jumyssyz júrgen nemese ózin-ózi qamtyǵan kóptegen turǵyn «Bastaý» baǵdarlamasymen bilim alyp, óz isin ashyp jatyr. Olarǵa qazir jaqsy qoldaý kerek. Óıtkeni onyń bári bizdiń basymyzdan ótti. Sondyqtan konferentsııada atqarylǵan jumystardan basqa biz jyldar boıy jınaqtaǵan tájirıbemizben bólisemiz. Sheberlik saǵattaryn ótkizý úshin basqa qalalardan arnaıy jattyqtyrýshylar shaqyrdyq», - deıdi SQO kásipkerler palatasy áıelder keńesiniń tóraǵasy Aıtyqan Qalǵaeva.
Jyl basynan «Bastaý» baǵdarlamasy boıynsha 940 áıel, «Jas kásipker» baǵdarlamasy boıynsha 274 qyz-kelinshek kýrstan ótip, kásipkerliktiń qyr-syryn úırengen.
Astanalyq Emın Askerov áleýmettik sheberhananyń jetekshisi. Arnaıy shaqyrtýmen kelgen kásipker áleýmettik az qamtylǵandarǵa, múgedekterge jumysqa ornalasýǵa nemese olardyń óz jeke isin ashýǵa kómektesip, baǵyt-baǵdar beredi. Qazir elimizde 250-deı áleýmettik kásipker bar.
«Sońǵy bes jyl boıy men áleýmettik kásipkerlikpen aınalysyp kelemin. Áleýmettik kásipkerlik qazirgi tańda Qazaqstan aýmaǵynda trendke aınalǵan. Keı oblystarda tipti mektepter de ashylǵan. Qazir SQO-da da osyndaı áleýmettik kásipkerlikke úıretetin mektep ashý máselesi sheshilip jatyr. Áleýmettik kásipkerlerdiń negizgi maqsaty – jumyspen qamtý, ekologııa jáne bilim berýdegi máselelerdi sheshý», - dep atap ótti Green Tal áleýmettik sheberhananyń jetekshisi Emın Askerov.
SQO-da qazir 30 myńnan astam shaǵyn jáne orta bıznes sýbektisi bar. Ár úshinshi kompanııany qyz-kelinshekter basqarady. Oblys bıýdjetine túsetin salyqtyń teń jartysy osy kásipkerlerdiń enshisinde.
Konferentsııaǵa kelgender jas kásipkerler uıymdastyrǵan kórmeni tamashalaýǵa múmkindik aldy. Sondaı-aq bul kúni isker áıelder keńesi BAQ ókilderi arasynda uıymdastyrǵan «Altyn sóz - 2019» baıqaýynyń qorytyndysy shyǵaryldy.
