SQO-da 13 myń ıt-mysyq esepke alyndy

PETROPAVL. KAZINFORM – Zań qabyldanǵannan beri Soltústik Qazaqstan oblysynda 13 myńǵa jýyq ıt-mysyq «TANBA» aqparattyq servısi arqyly esepke qoıyldy. 

SQO veterınarııa basqarmasynyń málimetinshe, «Janýarlarǵa jaýapkershilikpen qaraý týraly» Qazaqstan Respýblıkasynyń Zańy qabyldanǵannan bastap qańǵybas ıttermen jumys aýlaý-sterıldeý-vaktsınalaý-bosatyp jiberý qaǵıdaty boıynsha júrgiziledi.

– Qańǵyrǵan ıtter qala-aýyl turǵyndaryn alańdatyp otyr. Janýarlardyń adamǵa, malǵa shaýyp, agressııa bildirgen jaǵdaılary bar. Desek te, qoldanystaǵy zańnamaǵa sáıkes olardyń sany túrde rettelýi kerek. Itter aýlanyp, sterıldenip, vaktsına egilip, bosatyp jiberilgennen keıin agressııasy azaıady, kóbeımeıdi jáne aýmaǵyn basqa qańǵybas ıtterden qorǵaıdy. Osylaısha, popýlıatsııa sany birtindep azaıady, - deıdi mamandar. 

Búginge deıin oblys ortalyǵy aýmaǵynda 800-den astam qańǵybas janýar sterıldendi jáne vaktsına egildi. 

– Ókinishke qaraı, kóshedegi ıtterdiń bir bóligi – buryn úıde ustalǵan janýarlar. Olardy kóbinese qýyp jiberedi. Sondyqtan halyqpen úı janýarlaryna chıp salý, tirkeý, ustaý týraly túsindirý jumystary júrgiziledi. Tastandy janýarlar úshin ıeleri jaýap beredi. Máseleni barlyq taraptyń: jergilikti organdardyń, veterınarııalyq qyzmetterdiń, zooqorǵaýshylar men turǵyndardyń qatysýynsyz sheshý múmkin emes. Birlesken kúsh-jigerdiń arqasynda ǵana qańǵybas ıtterdiń sanyn azaıtýǵa bolady, - deıdi veterınarlar.

Jalpy SQO-da janýarlardy esepke alý jónindegi «TANBA» aqparattyq servısine 7 735 ıt pen 5 256 mysyq esepke qoıyldy. 

Buǵan deıin SQO-da buqa súzgen er adamnyń alty qabyrǵasy synyp, aýrýhanaǵa túskenin jazǵan edik.