SQO-da 126 kólik qar qursaýynan shyǵaryldy
PETROPAVL. QazAqparat – Soltústik Qazaqstan oblysynda boran kezinde qutqarýshylar bir táýliktiń ishinde 126 kólikti qar qursaýynan shyǵaryp, 245 adamǵa qol ushyn berdi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, keshe sekýndyna 30 metrge deıin jel turyp, boran soqty. Qolaısyz aýa raıy týraly óńirdiń 598 myńnan astam abonentke sms-habarlama jiberilip, sondaı-aq «Dármen» mobıldi qosymshasy arqyly aldyn ala eskertildi.
Boranda joldyń nashar kórinýine, kóktaıǵaqqa baılanysty oblysta avtokóliktiń barlyq túrleri úshin Aqjar, Aıyrtaý, Jambyl, Qyzyljar, Sh.Ýálıhanov, M. Jumabaev, Ǵ. Músirepov, Jambyl jáne Shal aqyn aýdandarynda 47 jol ýchaskesi jabyldy.
Alaıda eskertýge qaramastan jolǵa shyǵyp ketkender boldy. Qar qursaýynda qalǵandar úshin oblystyq jedel shtab qurylyp, «qaýyrt jeli» ashyldy.
Qyzyljar aýdanyndaǵy Shahovskoe eldi mekeniniń turǵyny Marııa Felbýsh dárigerge kóriný úshin aýdan ortalyǵyna kelgen. Ekiqabat áıel jumysyn bitirgenshe kesh túsip, boran kúsheıip ketken. Úıdegi tórt balasyna asyqqan ana jolǵa shyǵyp, dalada qaldy.
«Jumystarymdy bitirip, úıge qaıtam dep oılaǵam. Boran kúsheıip ketti. Jolda qaldym. Qutqarýshylarǵa alǵysym sheksiz. Qazir meni úıge, tórt balama apara jatyr», - deıdi Marııa.
Mamandardyń jedel áreketi nátıjesinde, qarǵa batqan 126 tehnıka shyǵarylyp, 220 adam, sonyń ishinde 19 bala qaýipsiz jerge jetkizildi. Aqtútek boranda jolda qalǵan 25 adam qutqaryldy.
