SQO-da 1200 polıtseı ardagerlermen birge qaıyrymdylyq senbiligine qatysty
PETROPAVL. QazAqparat - Petropavlda búgin alǵashqy jalpyqalalyq senbilik ótti. Oǵan eńbek ujymdary men qala turǵyndary, oqý oryndarynyń oqýshylary men stýdentter qatysty, dep habarlaıdy QazAqparat tilshisi.
Qaıyrymdylyq senbiliginen soltústikqazaqstandyq polıtseıler de shet qalǵan joq. SQO PD baspasóz qyzmetiniń habarlaýynsha, qoldaryna qural-saımandaryn alyp, ákimshilik ǵımarattardyń mańaılaryn tazalady.
Jedel ýákildermen, tergeýshilermen jáne ákimshilik polıtsııa ınspektorlarymen birge Ardagerler keńesiniń tóraǵasy Suraǵan Kópeev bastaǵan 30-dan astam aqsaqal da mańaıdy abattandyrýǵa atsalysty. Olar jıektastardy áktep, ótken jyldan túsken japyraqtardy jınap, týǵan vedomstvolarynyń mańyn áp-sátte retke keltirdi.
Oblystyq polıtsııa departamentiniń basshylyǵy da senbilikke shyqty. Polıtsııa genaral-maıory Berik Bilálov kezekti ret qolyna sharýashylyq quraldaryn alyp, jeke quramǵa úlgi kórsetti. Ol qyzmetkerlermen birge Estelik alleıasyn jınastyrýǵa qatysty.
Birneshe saǵat ishinde polıtsııanyń alty ákimshilik ǵımaratynyń - oblystyq Departamenttiń korpýstarynyń, qalalyq Basqarmanyń, birinshi jáne ekinshi polıtsııa bólimderiniń mańaıy tazartyldy.
Qalalyq polıtseılerdi aýdandyq polıtsııa bólimderindegi áriptesteri de qoldady. Jyldaǵy dástúrge saı qyzmetkerlerdiń bir kúndik jalaqysy SQO PD Ardagerler keńesiniń qoryna aýdarylady.
Polıtsııa qyzmetkerleri abattandyrý boıynsha is-sharalarǵa belsendi qatysyp, ákimshilik ǵımarattardy tazalyqta ustap, tártipsizdikke múldem tózbeýshilikti qalyptastyrýda turǵyndarǵa úlgi bolýlary tıis.
