SQO-da 1200 orynǵa shaqtalǵan stýdentter jataqhanasy salynbaq
PETROPAVL. QazAqparat – Soltústik Qazaqstan oblysynda jalpy sany 550 orynǵa shaqtalǵan eki stýdentter jataqhanasynyń qurylysy júrip jatyr, dep habarlaıdy QazAqparat tilshisi.
Bıyl oblystaǵy jalǵyz joǵary oqý ornyna kem degende 3 527 grant berilmek. Bul byltyrǵymen salystyrǵanda 13% artyq. Granttyń kóbeıýi stýdentterdiń artýyna sep. Nátıjesinde stýdentter sany 8 myńnan aspaq. Bul – 2017 jylmen salystyrǵanda 55% artyq.
«Qazirgi qıyn jaǵdaıǵa qaramastan, biz buǵan deıin josparlaǵanymyzdaı jańa oqý-zerthanalyq korpýstyń qurylysyn bastadyq. Jańa ǵımaratta 73 zamanaýı zerthana ornalaspaq. Injenerııa jáne tsıfrlyq tehnologııa, kólik, mashına jasaý, energetıka men radıotehnıka, azyq-túlik qaýipsizdigi, agronomııa, orman sharýashylyǵy jáne medıtsına mamandyqtary boıynsha oqıtyn stýdentterge arnalady», - deıdi SQO ákimi Qumar Aqsaqalov.
Budan basqa jataqhanalar qurylysy da júrip jatyr. Olardyń bireýi - 244, ekinshisi 306 orynǵa shaqtalǵan.
«Jataqhanalardyń salynýyna baılanysty qajettilik 34,5% qysqarady. Qazir 1594 oryn kerek bolsa, ol 1044-ke deıin azaıady. Bul máseleni tolyq sheshý úshin 1 200 adamdyq stýdentter jataqhanasynyń qurylysyn bastaýdy josparladyq. Qazirgi ýaqytta onyń jobalyq-smetalyq qujattary ázir, saraptamadan ótti. Qazir qurylysty júrgizetin ınvestordy izdep jatyrmyz», - deıdi óńir basshysy.
Jańa oqý jylynyń alǵashqy toqsanynda sabaqtar qashyqtan oqytylatyn bolǵandyqtan, SQO ákimi Qumar Aqsaqalov turmysy tómen otbasylardan shyqqan oqýshylardy qajetti tehnıkamen qamtýdy tapsyrǵan edi.
