SQO-da 120 sheteldik dropper anyqtaldy
PETROPAVL. KAZINFORM — Soltústik Qazaqstan oblysynda jyl basynan beri bank kartalaryn úshinshi adamdarǵa bergen 120 shetel azamaty anyqtaldy.
Olardyń basym bóligi — Ózbekstan men Qyrǵyzstan azamattary. Sondaı-aq, Úndistannyń bir azamaty bar.
SQO Polıtsııa departamentiniń málimetinshe, mundaı kartalar ınternet-alaıaqtyq shemalarynda paıdalanylýy múmkin. Olar belgili bir syıaqy úshin karta derekterin bógde adamdarǵa beredi nemese óz shotyna túsken aqshany basqa esepshottarǵa aýdarady. Sonyń saldarynan qarajattyń naqty alýshysy men qozǵalysyn anyqtaý qıyndaı túsedi.
SQO polıtsııa departamenti bastyǵynyń birinshi orynbasary Álibek Qujahmetov bank ókilderimen, Qazaqtelekom jáne Qazposhta ókilderimen kezdesip, ınternet-alaıaqtyqqa qarsy is-qımyl sharalaryn talqylady.
Kezdesýde kúmándi operatsııalar týraly aqparatty jedel jetkizý máselesine basymdyq berildi. Osy maqsatta bank qyzmetkerleri men polıtsııa arasynda WhatsApp tobyn qurý usynyldy. Máselen, bankke kelgen zeınetkerdiń bireýlerdiń yqpalymen nesıe rásimdeýge árekettengeni baıqalsa, qyzmetkerler bul týraly polıtsııaǵa habarlaı alady. Bul alaıaqtyqty der kezinde anyqtap, azamatty qarjylyq shyǵynnan qorǵaýǵa múmkindik beredi.
Sonymen qatar bul topta ınternet-alaıaqtardyń jańa tásilderi týraly aqparat jarııalaý josparlanyp otyr. Bul bank qyzmetkerlerine kúmándi jaǵdaılardy der kezinde baıqap, klıentterge eskertý jasaýǵa kómektesedi.
Polıtsııa bank kartalaryn ózge adamdarǵa berýdiń saldaryna da nazar aýdardy. Aqshany syıaqy úshin óz shoty arqyly ótkizýge kelisken adam da jaǵdaıǵa qaraı zań aldynda jaýap berýi múmkin. Al ınternet-alaıaqtyqtan zardap shekken azamattar keltirilgen shyǵyndy azamattyq-quqyqtyq tártippen óndirip alýǵa quqyly.
Dropperlerdi anyqtaý jáne olardyń bank kartalaryn zańsyz maqsatta paıdalanýyna jol bermeý úshin qarjy uıymdary da atsalysýy kerek. Kezdesý qorytyndysy boıynsha bank sektorynyń ókilderi shetel azamattaryna bank kartalaryn rásimdeý kezinde qosymsha sharalar qoldaný jónindegi usynystardy ózderiniń bas keńselerine joldaýdy josparlap otyr. Olardyń qatarynda klıenttiń karta ashý maqsatyn naqtylaý máselesi bar.
Buǵan deıin SQO-da ınternet alaıaqtyq 23% tómendegenin jazǵan edik.
