SQO-da 1,2 myń gektar egis alqaby sý astynda jatyr
PETROPAVL. KAZINFORM – Soltústik Qazaqstan oblysynda birer kúnde kóktemgi egis naýqany bastalady. Mamandardyń aıtýynsha, bıyl bolǵan sý tasqyny dala jumystaryn ýaqtyly ótkizýge áser etpeıdi.
Qazirgi ýaqytta dıqandar ylǵal jabý jumysyn aıaqtaýǵa jaqyn. SQO aýyl sharýashylyǵy jáne jer qatynastary basqarmasy baspasóz qyzmetiniń málimetinshe, tehnıka daıyn. Sharýalar lıtri 250 teńge bolatyn dızel otynymen qamtamasyz etildi. SQO-ǵa kóktemgi dala jumysyna 57,6 myń tonna dızel otyny qajet. 54,5 myń tonnaǵa shart jasaldy, operatorlar 41,5 myń tonnany satyp aldy.
«Bıyl 4,5 mln ga alqapqa daqyl egiledi, onyń 3,4 mln ga – dándi daqyl. 751 myń ga maıly daqyl, 379 myń ga jemshóp jáne 26,5 myń ga kókónis, sonyń ishinde kartop otyrǵyzylady. Tuqym jetkilikti. Bıyl sortty jańartý kórsetkishin 10%-ǵa jetkizý josparlanǵan. Osy kórsetkishke qol jetkizý úshin oblystyń aýyl sharýashylyǵy qurylymdaryn 48,5 myń tonna elıtalyq tuqym sebýi qajet», - deıdi vedomstvonyń baspasóz qyzmetiniń ókilderi.
Sý tasqyny kóktemgi egis naýqany barysyna áser etpeıdi. Qazir sý astynda shamamen 1 200 ga jer jatyr, sý aqyryndap ketýde, qajet bolǵan jaǵdaıda onyń ornyna parǵa qaldyrylǵan alqaptar qoldanylmaq.
Egis naýqanyn merziminde atqarýǵa 12,7 myń traktor, 14 myń astyq sepkish, 1,5 myń zamanaýı joǵary ónimdi egis keshenderi, 5 805 júk kóligi tartylmaq. Oblys aýmaǵynda 219 mashına-traktor sheberhanasy bar, barlyǵy shtattyq rejımde jumys isteıdi.
«Aýyl sharýashylyǵy salasyn memlekettik qoldaý aıasynda bıyl 60,8 mlrd teńge bólingen. Onyń ishinde ósimdik sharýashylyǵy salasyn damytýǵa – 20,4 mlrd teńge: tuqymǵa – 1,8 mlrd teńge, pestıtsıdterge – 11,3 mlrd teńge, tyńaıtqyshtarǵa 7,4 mlrd teńge jumsalmaq. Mal sharýashylyǵyna – 10 mlrd teńge, basqa baǵyttarǵa – 30,4 mlrd teńge bólinedi. Búgingi tańda bul qarajattyń 24,3 mlrd teńgesi ıgerilgen. Qarjy ınstıtýttary kóktemgi dala jumystaryn qarjylandyrýǵa 62 mlrd teńge, onyń ishinde «Keń Dala» baǵdarlamasy boıynsha – 22 mlrd teńge, «Azyq-túlik korporatsııasy» AQ forvardtyq satyp alý baǵdarlamasy boıynsha 14 mlrd teńge, «QazAgroQarjy» AQ 26 mlrd teńge bóldi», - deıdi baspasóz qyzmetindegiler.
Mamandardyń aıtýynsha, budan bólek kóktemgi egis jumystaryn nesıeleýge «Damý» Qorynyń kepildigimen 5% mólsherlememen «Keń Dala – 2» baǵdarlamasy boıynsha qosymsha 84 mlrd teńge bólindi.
Kóktemgi egis naýqanyna qatysty jaǵdaıdy baqylaý úshin jedel shtab quryldy. Týyndaǵan máseleler osy jerde jedel túrde qarastyrylady.
