SQO-da 12 kópqabatty turǵyn úı jylýsyz otyr

PETROPAVL. QazAqparat – Soltústik Qazaqstan oblysynda kóp qabatty 12 turǵyn úıge jylý berilgen joq. Al jeke sektor turǵyndarynyń 59 % ǵana qysqa qajetti kómirdi túsirip aldy, dep habarlaıdy QazAqparat tilshisi.

SQO ákimdiginde jylytý maýsymyna daıyndyq barysy pysyqtaldy. Oblystyq energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy Pavel Shılovtyń málimetinshe, jylytý maýsymy óńirde kestege saı bastaldy.

«285 km jylý jelisi bar bolsa, sonyń barlyǵy tolyq daıyndaldy, 6,3 km-ne kúrdeli jóndeý júrgizildi. Sondaı-aq 602 km sý taratý jelisiniń 6,5 shaqyrymy bıyl kúrdeli jóndeldi. Barlyq avtonomdy qazandyqtar qysqa ázir, áleýmettik nysandar men kóp qabatty turǵyn úıler boıynsha da másele joq», - dedi ákimdik otyrysynda esep bergen Pavel Shılov.

Alaıda, turǵyndar qysqa qajetti kómirdiń tek 59 % túsirip alǵan. Aqqaıyń aýdany kósh sońynda keledi, turǵyndardyń 31 % ǵana kómir alǵan, Mamlıýt aýdanynda turǵyndardyń 49 % ǵana qysqa daıyn. Petropavldyqtardyń teń jartysy ǵana kómirmen qamtyldy.

Jylytý maýsymy bastalsa da óńirde jylýsyz otyrǵan turǵyndar bar.

«Jylytý maýsymy oblys boıynsha 20 qyrkúıekte bastaldy. Qazirgi ýaqytta bıýdjettik nysandar tolyq qosylsa, turǵyn úılerdiń 99 % jylý berildi. Petropavl qalasynda - 6 jáne Saýmalkól eldi mekeninde 6 kóp qabatty úı jylýsyz otyr.

Petropavlda eki úı turǵyndardyń ótinishi boıynsha ázirge jylýǵa qosylǵan joq. Taǵy eki úı jańadan qoldanysqa berilgen, olardyń qujattary rettelip jatyr, al eki úıde jylý berilgennen keıin júıeden olqylyqtar anyqtalǵan, qazir ol jóndelip jatyr.

Aıyrtaý aýdanyndaǵy Saýmalkólde jańa ortalyq qazandyq paıdalanýǵa berilmek. Sý berýde másele bolǵan Nura toptyq sý qubyrynda, tıisti jumystar atqaryldy, búgin synaq retinde sý berip kóredi, al qazandyq erteń iske qosylady», - dedi Pavel Shılov.