SQO-da 112 eldi meken kóktemde sý basý qaýpi bar aımaqta tur
PETROPAVL. KAZINFORM – Soltústik Qazaqstan oblysynda sý tasqyny qaýpi bar 112 eldi meken esepke alynsa, onda 2,6 myń úı jáne 7 myńǵa jýyq turǵyn bar.
SQO Tótenshe jaǵdaılar departamenti basqarmasynyń bastyǵy Áset Shaıkınniń aıtýynsha, óńirde Esil, Shaǵalaly, Sileti, Qamysaqty ózenderiniń jáne olardyń salalarynyń tasýy, kólderdiń tolyp, arnasynan asýy, sondaı-aq erigen qar sýlary qaýip tóndiredi.
Máselen bes myńǵa jýyq turǵyny bar 38 eldi meken kóktemde tasýy múmkin ózenderdiń mańynda ornalasqan. 300-ge jýyq turǵyny bar 12 eldi mekenge kólderdiń tolyp, jaıylýy áser etýi múmkin. Al 1,7 myń turǵyny bar 62 eldi meken erigen qar sýynyń jolynda jatyr.
- Aqpan men naýryzdyń basynda qar jaýady degen boljam bar, sol sebepti qar qory áli de tolyǵady. Eger kún kúrt jylynsa, ózen-kólderdegi sý deńgeıi qaýipti mejege deıin kóterilýi múmkin. Óńirde sý tasqyny kezeńine daıyndyq aıasynda 37 ınjenerlik is-sharany qamtıtyn arnaıy jospar júzege asyryldy. Nátıjesinde, 23 shaqyrymnan astam qorǵanys bógetteri salyndy jáne nyǵaıtyldy, 15 sý ótkizý qubyry ornatyldy, 14 shaqyrymnan astam aryqtar tereńdetilip, tazartyldy, 2 shaqyrym shaǵyn ózen arnalary tazalandy, - deıdi Áset Shaıkın.
Tótenshe jaǵdaılarǵa jedel áreket etý úshin 2,2 myń adam jáne 1,4 myń shamasynda tehnıka daıyn tur. Quramynda TJD, medıtsına qyzmeti, Ulttyq ulan, jergilikti atqarýshy organdar, Qorǵanys mınıstrligi jáne polıtsııa ókilderi bar.
- 26 jeltoqsannan bastap Petropavl áýejaıynda Mı-8 tikushaǵy kezekshilikke qoıyldy. Ol sý tasqyny qaýpine jedel áreket etýge, monıtorıng júrgizýge jáne qajet bolǵan jaǵdaıda evakýatsııa jasaýǵa paıdalanylady. Oblysta 23,6 myń tonna ınertti materıal qory ázirlendi. Búginge deıin eldi mekenderden 398 myń tekshe metr qar shyǵaryldy. Halyqty ýaqytsha ornalastyrý úshin 15,5 myń adamǵa arnalǵan 283 evakýatsııalyq pýnkt daıyndaldy, - deıdi basqarma bastyǵy.
Mamannyń aıtýynsha, Esil jáne basqa da shaǵyn ózenderde muz keptelisteriniń aldyn alý úshin Petropavl qalasy men jeti aýdan 84 mln teńge bólip, jarylys jumystaryn júrgizýdi josparlap otyr.
Buǵan deıin Taraz qalasynda qalyń qardan keıin sý tasqynynyń aldyn alý sharalary júrgizilgenin jazǵan edik.