SQO-da 11 myńnan astam halqy bar Saýmalkól aýyly aýyz sýsyz otyr

PETROPAVL. KAZINFORM — Soltústik Qazaqstan oblysy Aıyrtaý aýdany Saýmalkól aýylynda sý máselesi ýshyǵyp tur.

Másele mamyr aıynyń sońynda bastalǵan. Jergilikti turǵyn Mádına Baımendınanyń aıtýynsha, sý 3-4 kúnge sóndirilip, keıde bir-eki kúnge ǵana beriledi. 

— Kópbalaly anamyn, kir jýý, as ázirleý, balany kúndelikti jýyndyrý qıyn. Sý bolmaǵandyqtan qoǵamdyq monsha da istemeıdi. Jeke turǵyn úıde turatyndar baý-baqshasyn, malyn sýara almaı otyr. Al kópqabatty úıde turatyndardyń jaıyn aıtpasa da túsinikti, sý bolmaǵandyqtan káriz júıesi de toqtaǵan, — deıdi ol.

Bastapqyda turǵyndarǵa sýmen qamtýshy kompanııanyń aýysýyna baılanysty másele týyndaǵany aıtylǵan. 

— Aldynda Ulttyq ekonomıka mınıstrligine hat joldadyq, Odan keıin aýdan ákiminiń orynbasary kelip, «sýmen qamtıtyn kompanııany aýystyryp jatyrmyz, oǵan ýaqyt kerek» dedi. Sosyn «turǵyndardyń qaryzyna baılanysty sýdy óshiremiz. Halyq qashan qaryzdan qutylady, sol kezde sýdy beremiz» dedi. Kúnde bir saǵatqa kólikpen sý ákeledi, biraq ol jetpeı qalady. Kóp bolsa bir otbasy eki shelek qana sý alady, al úlken ydysqa quıyp alý múmkin emes, óıtkeni kishkentaı ǵana bóshkemen ákelip taratady. Keı kóshelerge barmaıdy da, — deıdi Mádına Baımendına.

Sýdyń sóndiriletini týraly turǵyndarǵa habarlama jiberilip, eldi mekendi sýmen qamtamasyz etip kelgen «Saýmalkól jylý» JShS-niń 104 mln teńgeden astam qaryzy bary anyqtalǵan. 

Aıyrtaý aýdany ákimdiginiń málimetinshe, endi eldi meken turǵyndaryn sýmen «Aıyrtaý-Kommýn-Servıs» JShS qamtamasyz etedi. 

— «Saýmalkól jylý» JShS-niń Qazsýshar oblystyq fılıalyna elektr qýaty jáne sýǵa qaryzyna baılanysty osy ýaqytta sýdan ajyratyldy. Qazirgi ýaqytta onyń mindeti «Aıyrtaý-Kommýn-Servıs» JShS júkteldi. Sýmen jabdyqtaý jáne sý burý jelileri sapasyn arttyrý úshin qosymsha tehnıkalyq jabdyqtarǵa, sondaı-aq kúrdeli jóndeý jumystaryn júrgizýge qajetti qarajatty alý jumysy júrgizilip jatyr. Búgingi tańda sýmen jabdyqtaý qalypqa keldi, — delingen resmı jaýapta.

Turǵyndardyń aıtýynsha, búginde Saýmalkóldiń birqatar kóshesine sý berilgen. Biraq, áli de taza sýdy saryla kútkender bar. 

— Keı shaǵynaýdandarda sý áli joq, «apattyq jaǵdaı» deıdi. Barlyǵyna sý bergende JDS shaǵynaýdany eki kún sýsyz otyrdy. Keıin olarǵa berilip, basqa kóshelerde taǵy sý sóndirildi. Bul qalaı? — deıdi aýyl adamdary. 

Ákimdiktiń málimetinshe, Saýmalkólde 11 500 adam turady. 40 kópqabatty úı, 3755 jekemenshik úı jáne 3891 abonent bar, onyń 120-sy — zańdy tulǵa. Turǵyn úılerdiń 62% ortalyq sý júıesine qosylǵan. 

Aıyrtaý aýdanynda bas-aıaǵy 76 eldi meken bolsa, sonyń 28-inde ortalyq sý qubyry joq. Bıyl 12 eldi mekendi ortalyq jelige qosý josparda bar.

Taǵy 5 eldi mekenge sý tartý jobalary ázirlenip, bıýdjettik ótinimder berilgen eken.

Buǵan deıin Almatynyń Medeý aýdanynda kóp jyldan beri qordalanǵan sý máselesi sheshilgenin jazǵan edik.