SQO-da 102 mobıldik qosymshasyna turǵyndardan 400-den astam habarlama tústi
PETROPAVL. QazAqparat – Soltústik Qazaqstan oblysynda polıtsııanyń 102 mobıldik qosymshasyna bıylǵy jarty jylda qylmys, quqyq buzýshylyqtar jaıynda 427 habarlama tústi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, polıtseıler 102 mobıldik qosymshasy arqyly halyqtan mátindik, aýdıo habarlamalar qabyldap, beıne baılanysqa shyǵady. Kezekshi bólimniń ınspektorlaryna kez-kelgen gadjetten habarlasýǵa bolady, sondaı-aq Telegram messendjerinde bot arqyly da habarlama jiberýge jaǵdaı jaalǵan.
102 qosymshasy el aýmaǵynda 2021 jylǵy aqpanda iske qosyldy.
Bul servıs birinshi kezekte azamattarǵa yńǵaıly bolýy úshin ázirlengen. Ádettegideı habarlama, foto, beıne jáne aýdıo faıldardy da jiberip qana qoımaı, «SOS» batyrmasyn da paıdalanýǵa bolady, batyrma basylǵannan keıin polıtsııanyń Jedel basqarý ortalyǵyndaǵy kezekshi qyzmetkermen beıne baılanys ornatylady. Polıtsııa patrýli aryzdanýshynyń turǵan jerine shuǵyl attanýy úshin geolokatsııany anyqtaý qyzmetin qosý qajet.
Alaıda, tájirıbe kórsetkendeı, azamattar polıtsııa qosymshasyna júginbeı, kóp jaǵdaıda qylmys pen quqyq buzýshylyqtar týraly aqparatty belgili áleýmettik pablıkterde jarııalaıdy. Bundaı baılanys túri shuǵyl den qoıýdy tejeıdi, sebebi jarııalanymdardy anyqtap, taldaý kerek. Al «102» qosymshasyna kelip túsken habarlama mindetti túrde Jedel basqarý ortalyǵynda tirkeledi jáne qoldanýshyǵa resmı jaýap jiberiledi.
SQO PD ABB bólim bastyǵy Mıhaıl Zolkınniń aıtýynsha, óńirde polıtsııanyń 102 qosymshasyna táýligine orta eseppen 10 habarlama túsedi. Kóp jaǵdaıda olar kólik júrgizýshileriniń tártibine qatysty. Jalpy qosymsha iske qosylǵaly 427 habarlama kelip túsken, onyń 25-i beıne baılanys arqyly.
Mobıldik qosymshamen qatar burynǵydaı 102 nómiri arqyly da habarlamalar qabyldanyp jatyr. Jyl basynan soltústikqazaqstandyq polıtsııaǵa 85 myń 300-den asa qońyraý kelip túsken, onyń 19 810 qylmys pen quqyq buzýshylyqtar týraly habarlamalar, olar boıynsha polıtsııanyń shuǵyl áreket etýi qajet boldy. Jedel basqarý ortalyǵynyń ınspektorlary beıne kameralardyń kómegimen 10 337 ákimshilik quqyq buzýshylyqty tirkedi. Basym bóligi Jol júrisi erejelerin, qoǵamdyq tártiptiń buzý, sondaı-aq qoǵamdyq orynda mas kúıde júrgen tulǵalardy anyqtaý faktileri. Budan bólek, 7 aıda oblys ortalyǵynyń kóshelerinde beıne kameralardyń kómegimen 117 qylmys ashyldy.
