SQO-da 101 jastaǵy keıýanaǵa jańa kýálik úıine jetkizilip berdi
SQO Polıtsııa departamenti baspasóz qyzmetiniń málimetinshe, bıyl óńirdiń 700-ge jýyq azamatyna qujat úılerine jetkizilgen.
«Múgedek, júre almaıtyn jáne egde jastaǵy turǵyndar úılerinde qujattandyryldy. Oblystyń kóshi-qon qyzmetiniń mamandary «Azamattarǵa arnalǵan úkimet» memlekettik korporatsııasy» KEAQ qyzmetkerlerimen birge osy sanattaǵy azamattardy qujattandyrý úshin qalany ǵana qamtymaı, shalǵaıdaǵy aýyldyq okrýgterge de shyqty», - deıdi SQO PD Kóshi-qon qyzmeti basqarmasynyń bastyǵy Talǵat Ábilov.
Osyndaı shalǵaı eldi mekenderdiń biri - Ýálıhanov aýdanyndaǵy Qaırat aýyly. Mamandar 101 jasqa tolǵan Kókil Jaqypovaǵa qujat tapsyrý úshin arnaıy keldi. Keıýana jeke kýálikti 10 jyl buryn alǵan. Búginde onyń merzimi aıaqtalǵan eken.
Barlyǵy 2020 jyldyń basynan 30 myńǵa jýyq soltústikqazaqstandyq jeke basyn kýálandyratyn qujat aldy. Tótenshe jaǵdaı rejımi aıaqtalǵannan keıin oblystyq kóshi-qon qyzmetiniń qyzmetkerleri 9 944 azamatqa jeke kýálik pen pasport resimdegen. 600 jýyq sheteldik jyl basynan QR turaqty turýǵa arnalǵan ruqsat pen yhtııarhat alǵan, olardyń deni Reseı Federatsııasynyń azamattary.
Tártip saqshylarynyń aıtýynsha, tótenshe jaǵdaı kezinde qujat merzimi ótken azamattar 10 shildege deıin qujattaryn aýystyrý qajet.