SQO-da «100 jańa esim» jobasyna 140 adam qatysyp jatyr

PETROPAVL. QazAqparat – «100 jańa esim» jobasyna Soltústik Qazaqstan oblysynan belgili bir jetistikke jetken 139 adam qatysýǵa ótinim berdi, dep habarlaıdy QazAqparat tilshisi.

SQO ishki saıasat basqarmasynyń málimetinshe, «100 jańa esim» jobasy respýblıkalyq «Rýhanı jańǵyrý» baǵdarlamasy aıasynda 2017 jyldan bastap uıymdastyrylyp keledi.

Oǵan Táýelsizdik jyldary belgili bir jetistikke jetken, basqalarǵa úlgi bolarlyq tulǵalar qatysa alady. Jas, ult boıynsha jáne jynystyq shekteý joq.

«Bıyl «100 jańa esim» jobasy el Táýelsizdiginiń 30 jyldyǵy aıasynda uıymdastyryldy. Qatysýshylardyń eńbegin halyq baǵalap, daýys beredi. Jobaǵa qatysýǵa ótinim 22 aqpannan bastap bir aı qabyldandy. Endi 12 sáýirge deıin 100janaesim.ruh.kz saıtynda daýys berýge bolady», - deıdi SQO ishki saıasat basqarmasy basshysynyń orynbasary Jangúl Jolmuqanova.

SQO-dan 2019 jyly tek 46 adam ǵana ótinim berse, bıyl 139 qatysýshy bar.

Olar 7 nomınatsııa: medıtsına, bilim, ǵylym jáne ınnovatsııa, ekologııa, mádenıet, sport, bıznes jáne qoǵam boıynsha qatysyp jatyr.

Mysaly, oblystyq Qazaqstan halqy assambleıasynan 10 úmitker bar.

Onyń ishinde «Teń jol» áleýmettik startap-jobanyń avtory Sálimhan Sábıtov bar.

30 jastaǵy jigit Qazaqstanda birinshi bolyp tirek-qımyl apparaty zaqymdanǵan jandarǵa arnap avtomektep ashty.

Mamandardyń aıtýynsha, 2017 jyly SQO-dan 330 adam «100 jańa esim» jobasyna qatysty.

Onyń 8-i - Gennadıı Zenchenko, Kýlbaram Baıazıtova, Tatıana Kýcher, Andreı Kýharýk, Rashbıl Evdaev, Almas Beısenov, Vıtalıı Dıdenko, Garık Bernetsıan kóp daýys jınap jeńimpaz atandy.

2018 jyly 67 adam qatyssa, fınalǵa jetkender bolmady. Al 2019 jyly T. Zverıachenko 19 myńǵa jýyq daýys jınap, jeńiske jetti.