SQO-da 100 lıtrden astam zańsyz alkogol saýdadan alyndy

PETROPAVL. QazAqparat – Soltústik Qazaqstan oblysynda aýyl turǵyny spırt ishimdikti jasyryn satyp kelgen. Polıtseıler 100 lıtrden astam lıtsenzııalanbaǵan quramynda spırti bar ónimdi tárkiledi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Ǵabıt Músirepov atyndaǵy aýdanda aýyl turǵynynyń biri alkogoldi jasyryn satyp kelgen. Krımınaldyq polıtsııa qyzmetkerleri jáne 5 aýyldyq okrýgke qyzmet kórsetetin Chıstopole aýyldyq poselkelik polıtsııa pýnktiniń ýchaskelik polıtsııa ınspektorlarynyń birlesken reıd ótkizdi. Lıtsenzııasy joq spırt ónimin satqan aýyl turǵyny osy tekseris barysynda anyqtaldy.

Tártip saqshylary «Tıisti tirkeýsiz, ruqsatsyz nemese habarlama jibermeı kásipkerlik nemese ózge de qyzmetpen aınalysý, sondaı-aq áreketterdi (operatsııalardy) júzege asyrý» baby boıynsha materıal jınady. Kólemi 0,5 lıtrden 5 lıtrge deıin 100-den astam plastık bótelke tárkilendi. Saraptama taǵaıyndaldy, nátıjeleri boıynsha materıaldar sotqa joldanady.

«Bul jyl basynan aýdanda tárkilengen eń iri kólemdegi zańsyz alkogol. Aýyl turǵynynyń sózine qaraǵanda, ol spırtti satý úshin Kókshetaý qalasynan jetkizip otyrǵan. Tıisti jaǵdaıda saqtalmaıtyn, lıtsenzııasy joq spırt ishimdik adam densaýlyǵyna zııan keltirýi múmkin. Jyl basynan aýdanda alkogoldi zańsyz satýdyń 9 faktisi anyqtaldy», - deıdi Ǵabıt Músirepov atyndaǵy aýdandyq polıtsııa bóliminiń bastyǵy Marat Áljanov.