SQO-da 100-ge jýyq eldi mekendi sý shaıýy múmkin - TJD
PETROPAVL. QazAqparat – Soltústik Qazaqstan oblysynda bıyl kóktemde sý tasqyny qaýpi bar. Tótenshe jaǵdaıdyń aldyn alý maqsatynda óńirde tıisti sharalar qolǵa alyndy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, bıylǵy meteorologııalyq boljam jáne ylǵal qoryn taldaý alda sý tasqyny qaýpi bar ekendigin kórsetti. Óńirde úsh myńnan astam ózen-kól bar. Sonyń ishinde Esil, Shaǵly, Sileti, Qamysaqty ózenderinen keletin qaýip zor. Arnasynan shyqqan ózender men erneýinen asqan kólderden oblysta 100-ge jýyq eldi mekendi sý shaıýy múmkin.
Sol sebepti qazirdiń ózinde tótenshe jaǵdaıdyń aldyn alý maqsatynda keshendi is-sharalar qolǵa alyndy. Bul sý tasqyny kezinde jedel áreket etýge, onyń saldaryn azaıtýǵa septigin tıgizbek.
Halyqqa jedel kómek kórsetý qajet bolǵan jaǵdaıda QR Ulttyq ulany 6637 áskerı bóliminen 60 adam men 4 tehnıka bólinedi. Osyǵan baılanysty kúsh qurylymynyń ázirligin pysyqtaý maqsatynda oqý-jattyǵý ótti.
Dabyl boıynsha barlyq jeke quram men tehnıka sapqa turǵyzylyp, arnaıy-taktıkalyq oqý-jattyǵý, sondaı-aq avarııalyq-qutqarý jumystaryn júrgizý, shuǵyl dárigerge deıingi kómek kórsetý erejeleri boıynsha oqytý semınarlary ótkizildi. Sarbazdarmen «SQO TJD Órt sóndirý jáne avarııalyq-qutqarý jumystary qyzmeti» MM jedel-qutqarý jasaǵynyń, SQO boıynsha apattar medıtsınasy ortalyǵynyń mamandary tájirıbe bólisti. Gvardııashylar arnaıy tehnıka men jabdyqtardy paıdalanýdyń negizgi tásilderimen tanysty, sýda zardap shekkenderge alǵashqy medıtsınalyq kómek kórsetýdiń jáne jeke qaýipsizdiktiń negizgi erejelerin pysyqtady.
Jalpy, sý tasqynymen kúreste jedel áreket etýge TJD tarapynan oblys aýmaǵynda quramynda 484 adam jáne 155 tehnıka, 8 júzý quraly jáne 72 motopompa bar ishki ister organdary arasynan arnaıy top quryldy.
Jergilikti atqarýshy organdar tarapynan bul jumystarǵa 1619 adam, 1163 tehnıka, onyń ishinde 299 sý sorǵysh tehnıka, 109 aýyr ınjenerlik tehnıka jáne 83 júzý quraly daıyndaldy. Janarmaı jáne ınertti materıaldar, qaptar ázirlengen.
