SQO-da 100-ge jýyq áje doıby, shahmat, toǵyzqumalaqtan synǵa tústi
PETROPAVL. QazAqparat - SQO-y Qyzyljar aýdany Beskól eldimekeninde ájeler spartakıadasy ótti, dep habarlaıdy QazAqparat tilshisi.
Sap túzegen zeınetkerler óz aýyldyq okrýgteriniń namysyn qorǵaýǵa kelipti. 19 komanda, 100-ge jýyq áje ústel oıyndarynan: doıby, shahmat, toǵyzqumalaqtan synǵa tústi.
Beskól aýylynyń turǵyny Jankúmis Aıapovanyń jasy 59-da. Mektepte qyryq jylǵa jýyq orys tili men ádebıetinen sabaq bergen ardager ustaz byltyr zeınet demalysyna shyqqan eken. Jankúmis apaı bala kezinen shahmatqa qumar. Búgingi spartakıadaǵa da sporttyń osy túrinen qatysyp jatyr.
«Shahmetpen men bala kezimnen oınaımyn. Stýdent, keıin ustaz bolǵanda da sporttyń osy túrinen únemi jarystarǵa qatysatynmyn. Byltyr zeınet demalysyna shyqtym. Spartakıada ótetinin estigende shyny kerek, qýandym. Óıtkeni mundaı jıyndardy zamandas-dostaryńdy kóresiń, basqalarmen aralasasyń», - deıdi spartakıadaǵa qatysýshy Jankúmis Aıapova.
Mundaı is-shara buǵan deıin Qarttar kúnine oraı uıymdastyrylsa, bıyl spartakıadaǵa tek qana ájeler qatysyp jatyr.
«Osy jalǵyz Beskól selolyq okrýginde ǵana eki myńǵa jaqyn zeınetker turady. Merekeni osylaısha sporttyq sharamen atap ótýdi sheshtik. Barlyq aýyldyq okrýgterden 5-6 adamnan qatysyp jatyr», - deıdi Qyzyljar aýdany Ardagerler keńesiniń tóraǵasy Jumanǵalı Qojahmetov.
Qazirgi ýaqytta Qyzyljar aýdanynda 8,5 myń zeınetker turady. Olardyń ýaqyttaryn kóńildi, ári tıimdi ótkizýi úshin arnaıy klýbtar, úıirmeler jumys isteıdi. Sondaı-aq, ónerpaz ata-ájelerdiń basyn qosqan «Beskól nury» jáne «Ivýshka» atty halyqtyq eki hor búginde kórermenderiniń qoshemetine bólenip júr.
