SQO-da 100-den astam mas júrgizýshi jazaǵa tartyldy
NUR-SULTAN. QazAqparat - Soltústik Qazaqstan oblysynda jyl basynan beri polıtsııa qyzmetkerleri óńirlik joldarda 111 mas júrgizýshini ustady, dep habarlaıdy QazAqparat tilshisi.
Oblystyq polıtsııa departamenti baspasóz qyzmetiniń málimetinshe, mas júrgizýshilerdiń kinásinen bir adam qaza taýyp, taǵy bir adam jaraqat alǵan. Munan bólek, taǵy alty jol apaty kezinde azamattardyń densaýlyǵyna jeńil-jelpi zaqym kelgen nemese materıaldyq shyǵyn ótelgen.
«Ótken aptada ǵana Petropavl qalasynyń 34 jastaǵy turǵyny Subary Legacy kóligin basqaryp kele jatyp, qalanyń ortalyq kósheleriniń birin jaryqtandyratyn nysanǵa zaqym keltirdi. Medıtsınalyq kýálandyrý onyń ishimdikke mas kúıde bolǵanyn kórsetti. Sot sheshimimen azamat 20 táýlikke ákimshilik qamaýǵa alyndy jáne 7 jylǵa kólik júrgizý quqyǵynan aıyryldy», - dep atap ótedi departamenttiń baspasóz qyzmetinen.
Anyqtalǵan faktilerdiń 104-i boıynsha is sotqa jiberilgen.
«11 qańtardan bastap mas júrgizýshilerge qatysty zańnama qatańdatyldy. Kólik basqarý quqyǵynan aıyrý merzimi 7-den 9 jylǵa deıingi merzimdi quraıdy. Buǵan qosa, quqyqbuzýshylyqtyń aýyrlyǵyna baılanysty 15-ten 25 táýlikke deıin ákimshilik tutqynǵa alý mindetti túrde qoldanylady. Jazanyń balamasy joq», - dedi ákimshilik polıtsııa basqarmasynyń bastyǵy Jasulan Ospanov.
Olesıa Jýkoven
