SQO-da 100-den astam qyzmetkerdiń quqyǵy qorǵalyp, olarǵa 17 mln teńge tólendi

PETROPAVL. KAZINFORM – Soltústik Qazaqstan oblysynda byltyr memlekettik eńbek ınspektsııasyna jeke jáne zańdy tulǵalardan 1 245 ótinish túsken. 

Eńbek ınspektsııasy komıtetiniń SQO boıynsha departamentiniń málimetinshe, eńbek ınspektorlary ótinishterdiń negizinde 224 tekserý júrgizdi, nátıjesinde 500-ge jýyq zańbuzýshylyq anyqtaldy.

– Derekterdiń basym bóligi eńbek qatynastary salasyna qatysty. Atap aıtqanda, 25 is áleýmettik-eńbek qatynastaryna, al 213 is eńbek qaýipsizdigi jáne eńbekti qorǵaý máselelerine baılanysty tirkeldi. Tekserý qorytyndylary boıynsha jumys berýshilerge anyqtalǵan zańbuzýshylyqtardy joıý týraly 131 nusqama berildi. Sonymen qatar Qazaqstan Respýblıkasynyń zańnamasyn buzǵany úshin 72 laýazymdy jáne zańdy tulǵaǵa 11,4 mln teńge kóleminde ákimshilik aıyppul salyndy, - deıdi departament basshysynyń mindetin atqarýshy Azat Kósherbaev.

Eńbek ınspektorlarynyń aralasýynan keıin 103 qyzmetkerdiń quqyǵy qorǵalyp, olarǵa jalpy somasy 17 mln teńge jalaqy men ózge de tólemder óndirilip berildi.

Mamandardyń aıtýynsha, jalpy alǵanda, óńirde áleýmettik-eńbek qatynastary salasyndaǵy jaǵdaı turaqty. Qazirgi ýaqytta, ınspektsııanyń málimetinshe, oblysta aǵymdaǵy jáne merzimi ótken bereshek joq. 

Buǵan deıin SQO-da eńbek táýekelderiniń tsıfrlyq kartasyna 30 shaqty kásiporyn engenin jazǵan edik.