SQO-da 10 jasar balanyń úıden qashýyna kórgen qorlyǵy sebep: Jetkinshek balalar úıine jiberildi
SQO prokýratýrasynyń málimetinshe, úıden qashyp, eki kúnnen keıin ıesiz úıden tabylǵan balanyń denesi kógergen.
Qazir aýdandyq aýrýhanada em alyp jatqan balanyń jaǵdaıy qanaǵattanarlyq, ómiri men densaýlyǵyna qaýip joq.
«Denesindegi jaraqattardyń bolýy QR QK-niń 140-baby 2-bóligi «kámeletke tolmaǵandy tárbıeleý boıynsha mindetterin oryndamaý» boıynsha sotqa deıingi tergep-tekserýdiń bastalýyna negiz boldy.
Aýdan prokýratýrasynyń muryndyq bolýymen patronattyq tárbıeleý týraly shart toqtatyldy, kámeletke tolmaǵan balany ata-anasynyń qamqorynsyz qalǵan jetim balalarǵa arnalǵan bilim mekemesine ornalastyrý týraly sheshim qabyldandy.
Balany tıisti tárbıelemeýdiń bul deregi qadaǵalaý organy ókiliniń qatysýymen aýdan ákimdiginiń janyndaǵy kámeletke tolmaǵandardyń isteri boıynsha komıssııada qaraldy», - delingen prokýratýranyń baspasóz habarlamasynda.
Bul is egjeı-tegjeıli tekserilmek. Ókiletti organdar – prokýratýra, qamqorshylyq organ jáne bilim basqarmasy ókilderinen jumys toby quryldy.
Odan bólek, oblys prokýratýrasy ókiletti organdardyń laýazymdy tulǵalarynyń áreketine baǵa bermek.
Buǵan deıin SQO Ýálıhanov aýdanynda 10 jasar bala joǵalyp, tek eki táýlikten keıin ǵana aman-esen tabylǵanyn aıtqan edik.
Jasóspirim polıtsııanyń qyzmettik-izdestirý ıtiniń kómegimen bos turǵan úılerdiń birinen tabyldy.
Osy oqıǵaǵa qatysty SQO bilim basqarmasy da túsinik berdi.
Vedomstvonyń baspasóz qyzmetiniń málimetinshe, jasóspirim 2017 jyly 3 jasynda balalar úıinen otbasyna patronattyq tárbıege berilgen.
30 qańtar kúni patronatty tárbıeshimen patronattyq tárbıe týraly kelisimniń kúshi joıyldy.
Sondaı-aq bilim basqarmasy da istiń anyq-qanyǵyna jetý úshin arnaıy komıssııa qurdy.
Onyń qorytyndysy boıynsha Ýálıhanov aýdandyq qorǵanshylyq jáne qamqorshylyq organdarynyń jáne mektep ujymynyń jumysyna baǵa berilmek.
