SQO-da 10 sotyq jerge kezek bıyl qanshaǵa jyljydy

PETROPAVL. KAZINFORM — Soltústik Qazaqstan oblysynda 29 222 adam 10 sotyq jer alýǵa kezekke turǵan.

SQO aýyl sharýashylyǵy jáne jer qatynastary basqarmasynyń málimetinshe, jeke turǵyn úı qurylysy úshin jer ýchaskesin alý kezegi 2003 jyldan bastap bar. Buryn 10 sotyq jer telimine ótinish berý úshin jergilikti ákimdikke barý kerek bolsa, qazir ony eshqaıda shyqpaı-aq eOtinish servısi arqyly berýge bolady.

— Jeke turǵyn úı qurylysyna qajet jer ýchaskesin alýǵa ótinish bildirgenderdiń 23 myńy Petropavl qalasy boıynsha, qalǵany oblys aýdandarynda kezekte tur. 2003 jyldan bastap búginge deıin oblys boıynsha barlyǵy 8518 jer ýchaskesi berildi. Onyń ishinde Petropavlda — 3219, oblys aýdandarynda — 5303 ýchaske. Jer ýchaskelerin alǵan azamattardyń áleýmettik mártebesi kórsetilmeıdi, óıtkeni arnaıy esepke qoıý kezinde azamattar sanattar boıynsha bólinbeıdi jáne jer ýchaskesin alýǵa biryńǵaı kezekke turady, — deıdi basqarmanyń jerdi esepke alý, jer ýchaskelerin alý jáne berý bóliminiń basshysy Marat Týleev.

Bıyl óńirde alǵashqy jeti aıda 86 ýchaske berilse, 35 adamǵa 10 sotyq jer Petropavldan buıyrǵan. 

— Zańǵa sáıkes jeke turǵyn úı qurylysy úshin jer ýchaskeleri sýmen jabdyqtalǵan jáne elektr jelisi bar aýmaqtarda beriledi. Al aýyldyq jerlerde elektrmen jabdyqtaý jelileri bolsa jetkilikti. Qoldanystaǵy bas josparǵa jáne «ıÝjnyı» shaǵyn aýdany men «Solnechnyı-2» shaǵyn aýdanynyń egjeı-tegjeıli josparlaý jobasyna sáıkes munda jeke turǵyn úı qurylysy kózdelgen. Qazirgi ýaqytta «ıÝjnyı» shaǵyn aýdanynda ınjenerlik ınfraqurylym tartylyp jatyr. «Solnechnyı-2» shaǵyn aýdanynda ınjenerlik kommýnıkatsııalar júrgizildi. Jer ýchaskelerin berýdi bastaý týraly aqparat buqaralyq aqparat quraldarynda habarlanady, — deıdi bólim basshysy.

Esterińizge salaıyq, Petropavlda qala turǵyndaryna jeke úı salý úshin 3 myń jer telimi tegin beriletinin jazǵan edik. 2022 jyldan beri kezekte turǵandar sany taǵy 6,5 myńǵa artqan.