SQO-da 10 myńnan astam otbasy áleýmettik turǵyn úımen qamtamasyz etiledi

NUR-SULTAN. QazAqparat – Soltústik Qazaqstan oblysynda áýe reısteriniń sany artady. Bul týraly Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Azamattyq avıatsııa salasynda Soltústik Qazaqstan oblysynda 2025 jylǵa deıin jolaýshylar aǵynyn jylyna 40 800 adamǵa deıin jetkizýdi josparlap otyrmyz. Óńirdegi iskerlik belsendilikti damytýdy yntalandyrý maqsatynda sýbsıdııalanatyn avıareısterdiń sany aıyna 16-dan 68-ge deıin ulǵaıtylatyn bolady. Bul sharalar áýejaı qyzmetin shyǵynsyzdyqqa shyǵarýǵa, sondaı-aq azamattardyń eldiń iskerlik jáne ákimshilik ortalyqtarymen baılanysyn qamtamasyz etýge múmkindik beredi», - dedi mınıstr.

Onyń aıtýynsha, qurylys jáne kommýnaldyq-sharýashylyq salasynda «Nurly jer» memlekettik baǵdarlamasy aıasynda 2025 jylǵa deıin Soltústik Qazaqstan oblysynda 2,3 mln sharshy metr nemese 21,7 myń baspana salý josparlanyp otyr. Onyń ishinde memlekettik qarajat esebinen 10 myńnan astam otbasy áleýmettik turǵyn úımen qamtamasyz etiledi.

Aıta keteıik, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy. Premer-Mınıstr Asqar Mamın keshendi jospar óńirdiń ınfraqurylymyn jaqsartatynyn atap ótti.