SQO-da 10 mln teńge para alǵan ákimdiktiń laýazymdy tulǵalary sottaldy
PETROPAVL. KAZINFORM – Soltústik Qazaqstan oblysynda Taıynsha aýdany ákiminiń orynbasary jáne turǵyn úı-kommýnaldyq sharýashylyq bóliminiń basshysy para alǵany úshin sottaldy.
SQO prokýratýrasynyń málimetinshe, sheneýnikter joldardy aǵymdaǵy jóndeý boıynsha oryndalǵan jumys aktilerine kedergisiz qol qoıý úshin jergilikti kásipkerden 10 mln teńge para alǵan.
Bultartpas dálelder bolsa da, jaýapqa tartylǵan olar óz kinálaryn moıyndamaı, istegen isterine ókinish bildirmegen. Para bergen kásipker de jazadan qutylmady, memlekettik aıyptaý para berý jáne alý faktilerin dáleldedi.
Petropavl qalalyq soty kinálilerdi 3 jyl 6 aıdan bastap, 7 jyl 6 aıǵa deıin naqty túrde bas bostandyǵynan aıyrý jazasyna kesti. Sondaı-aq olarǵa ómir boıyna memlekettik qyzmette jáne kvazımemlekettik sektor sýbektilerinde laýazym atqarýǵa tyıym salyndy.
Sottalǵandar jazalaryn qylmystyq-atqarý júıesiniń ortasha qaýipsizdiktegi mekemelerinde óteıdi. Úkim zańdy kúshine endi.
Buǵan deıin Halyqty jumyspen qamtıtyn mekeme basshylary para aldy degen kúdikke ilingenin jazǵan edik.