SQO-da 10 adam «Halyq alǵysy» medalimen marapattaldy
PETROPAVL. QazAqparat – Soltústik Qazaqstan oblysynda túrli salanyń ókilderi, barlyǵy 10 adam «Halyq a lǵysy» medalimen marapattaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavl qalasynyń ýchaskelik polıtsııa ınspektory óziniń kásibı merekesi kúni «Biz birgemiz» onlaın-forýmyna qatysty. Onlaın-forým aıasynda Prezıdent Qasym-Jomart Toqaev pandemııaǵa qarsy kúreste erekshe kózge túsken bilim, densaýlyq saqtaý, áleýmettik qorǵaý salasynda qajyrly eńbek etip júrgen azamattarǵa, sonyń ishinde alǵy shepte júrgen tártip saqshylaryna alǵysyn bildirdi.
Polıtsııa aǵa leıtenanty Stanıslav Alıfırenko Memleket basshysynyń aldynda sóz sóıledi. Onyń ishki ister organdaryna kelgenine jeti jyl bolǵan.
«Óz áriptesterimmen birge men blok-posttarda kezekshilik atqardym. Qazir karantındegi podezderdi, provızorlyq ortalyqtardy kúzetý boıynsha jumysty jalǵastyrýdamyz. Májbúrli sharalarǵa adamdardyń barlyǵy birdeı túsinistikpen qaraı bermeıdi. Sondyqtan vırýstyń taralýyna jol bermeý maqsatynda tártip saqtaýdyń mańyzylyǵyn túsindirýge týra keledi. Meniń otbasyma da, qazaqstandyqtardyń kópshiligine de bul kezeń ońaı soqpady. Qasym-Jomart Kemeluly, bizdiń jumysymyzǵa joǵary baǵa bergenińiz úshin rızashylyǵymdy bildiremin. Sizdiń qoldaýyńyz barlyq polıtsııa qyzmetkerlerine aldaǵy ýaqytta aýyrtpalyq pen qıyndyqtardy moıymaı jeńýge serpin beredi. Boıymyzdaǵy senimdilik úshin Sizge alǵys aıtamyz», - dedi polıtsııa ofıtseri prezıdentpen bolǵan tikeleı baılanysta.
Onlaın-forýmǵa 10 soltústikqazaqstandyq qatysty. Olardyń barlyǵy «Halyq Alǵysy» medalimen marapattaldy.
«Sizder meıirimdilik pen nıettestiktiń naǵyz úlgisisizder. Sizder sııaqty adamdar barda kez kelgen qıyndyqtan ótemiz, - dedi SQO ákiminiń birinshi orynbasary Marat Tasmaǵanbetov marapattardy tabystaý saltanatynda.
