SQO-da 1 jeltoqsannan bastap qaraǵaıly-shyrshaly ormandarǵa kúzet qoıylady
PETROPAVL. QazAqparat – Soltústik Qazaqstan oblysynda Jańa jyl merekesine deıin qylqan japyraqty ormandar qorǵaýǵa alynyp, orman sharýashylyǵy mamandary men tártip saqshylarynan quralǵan mobıldi toptar kezekshilik etedi, dep habarlaıdy QazAqparat tilshisi.
Jańa jyl meıramy qarsańynda brakonerlerdiń qylqan japyraqty aǵashtarǵa qyzyǵýshylyǵy artady. Mereke nyshany - shyrshalardy zańsyz kesýden saqtaý maqsatynda bıyl da ormandar jeltoqsan aıy boıy kúzetilmek.
SQO tabıǵı resýrstar jáne tabıǵat paıdalanýdy retteý basqarmasynyń málimeti boıynsha, qylqan japyraqty aǵashtar ósetin eldi mekenderdiń janyna 22 statsıonarlyq beket qoıylady. Budan basqa basqarma orman ıelerimen birge 92 mobıldi top quryp, kúndelikti reıdter uıymdastyrmaq. Qoryqshylar qarýmen, qajetti kólikpen, baılanys quralymen tolyq jabdyqtalǵan.
Bul jumysqa tártip saqshylary da jumyldyrylyp, táýlik boıy kezekshilik atqarylady. Byltyr osyndaı aýqymdy is-sharalardyń nátıjesinde bir de bir shyrsha ruqsatsyz kesilgen joq.
«QR Ákimshilik quqyq buzýshylyq týraly Kodekstiń 381-1 baby boıynsha orman qoryna kiretin aǵashtar men butalardy zańsyz kesý, joıý nemese zaqymdaý saldarynan 100 AEK deıin shyǵyn ákelse, jeke tulǵaǵa - 20, laýazymdy tulǵa jáne shaǵyn kásipkerlik sýbektilerine nemese kommertsııalyq emes uıymdarǵa – 40, orta kásipkerlik sýbektilerine – 50 jáne iri kásipkerlerge 200 AEK mólsherinde aıyppul salynady. Buǵan qosa kesilgen aǵash, minip kelgen kóligi men aǵash kesýge paıdalanylǵan quraldary tárkilenedi», - deıdi SQO tabıǵı resýrstar jáne tabıǵatty paıdalanýdy retteý basqarmasynyń bólim bastyǵy Vasılıı Labanchýk.
Al keltirilgen shyǵyn kólemi 100 AEK mólsherinen asyp ketken jaǵdaıda qylmystyq is qozǵalyp, sotqa jiberilmek.
Bıyl oblystyń memlekettik orman sharýashylyqtary shyrshalardy uıymdar men mekemelerdegi mádenı-kópshilik is-sharalardy ótkizýge ǵana bosatady. Ol úshin oblystyń ákimdikteri aldyn-ala ótinish berýi qajet. Osy maqsatqa 220 qylqan-japyraqty aǵash kesilmek.
Shyrshany oblys aýmaǵynda satýǵa «Kondratov tájirıbelik-kórsetkish orman pıtomnıgi» JShS ruqsaty bar. Sondaı aq bıyl da óńirge qylqan japyraqty aǵash Reseı Federatsııasynan kóptep jetkizilmek.
