SQO-da 1,5 myń otbasy qonys toıyn toılaıdy
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov óńirdiń áleýmettik-ekonomıkalyq damýynyń birinshi jartyjyldyqtaǵy qorytyndylary boıynsha oblystyq máslıhat depýtattarynyń aldynda esep berdi, dep habarlaıdy QazAqparat.
Aımaq ákimdiginen málim etkendeı, birinshi jartyjyldyqta oblysta oń kórsetkishterge qol jetkizildi. Alty aıda ekonomıka ósimi 107,6 paıyzdy qurady jáne bul kórsetkish boıynsha úzdik 6 oblystyń qataryna endi.
«Al qurylys salasynda soltústik óńiri birinshi orynda keledi. Qurylys jumystarynyń kólemi 1,7 esege artty. SQO eksport kólemin 1,3 esege arttyryp, ımportty 10 paıyzǵa azaıtty. Bizdiń óńir aýyl sharýashylyǵyna ınvestıtsııa tartý boıynsha da kósh basynda. Birinshi jarty jylda elimizdegi ınvestıtsııanyń 26 paıyzy soltústiktiń enshisinde. Bul - 32 mlrd tg. SQO byltyr da kósh basynda bolǵan edi», - dedi Q.Aqsaqalov.
Atap ótilgendeı, bıyl 230 myń sharshy metr turǵyn úı qoldanysqa beriledi. 1500 otbasy qonys toıyn toılaıtyn bolady. Óńir aýdandarynda aýyl turǵyndaryna arnalǵan baspanalardyń qurylysy bastaldy. Bıyl 100 úı boı kóterse, kelesi jyly 600 úı salý josparlanǵan.
Sondaı-aq Petropavlda jańa oqýshylar saraıy, tennıs ortalyǵy, eki zamanaýı qonaq úı, «Dostyk Mall» saýda ortalyǵy ashylady. Oblys ortalyǵynda 1500 balaǵa shaqtalǵan eki mektep salynýda.
SQO ákimi zaýyttardy jańartý boıynsha da aıtyp ótti. «PAMJ» jáne «Kırov atyndaǵy zaýyt» AQ materıaldy-tehnıkalyq bazany jańartý jumystaryn bastamaq. «ZIKSTO» AQ óz qaramaǵynda vagon shyǵaratyn zaýyt ashpaq. Qýattylyǵy - jylyna 5 myń júk vagony.
Óńirde 5 iri ınvestıtsııalyq jobany júzege asyrý kózdelýde. Investıtsııa kólemi 100 mlrd teńgeni qurap, 2 myń jańa jumys orny ashylmaq.
Aýdandarǵa dárigerlerdi tartý úshin alǵash ret oblystyq bıýdjetten 75 mıllıon teńge bólindi. Bul somaǵa 50 dáriger kótermeaqy alady.
Qumar Aqsaqalov Elbasynyń tapsyrmasy boıynsha keshendi jospardy júzege asyrý aıasynda kóp jumystyń atqarylatyndyǵyn atap ótti. Bul jospardyń arqasynda óńirdegi keleli máseleler sheshilip, turǵyndardyń ál-aýqaty jaqsarmaq.
