SQO-da 1,5 myń dáriger men 5 myń medbıkeniń jalaqysy ósedi
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov óńirdiń medıtsına qyzmetkerleri men ustazdarynyń eńbekaqysy Jańa jyldan bastap qanshaǵa artatynyn aıtty, dep habarlaıdy QazAqparat tilshisi.
SQO-da bıyl eńbekaqy mólsheri orta eseppen 16,1% artqan. Óńir basshysy Qumar Aqsaqalov dárigerler men muǵalimderdiń eńbekaqysy boıynsha óz pikirin bildirdi.
«Eńbek ótili 5-6 jyl bolatyn dárigerdiń ortasha eńbekaqysy bıyl 182 myń teńgeni qurady. Maýsym aıynda ortasha 30% artyp, qazir 234 myń teńge shamasynda alyp júr. Al jańa jylda mindetti áleýmettik medıtsınalyq saqtanyrý júıesiniń engizilýine baılanysty medıtsına mamandarynyń eńbekaqysy taǵy 30% artpaq. Osylaısha orta eseppen 260-280 myń teńgege jetpek», - deıdi Qumar Aqsaqalov.
Jańa jylda oblystyń 1,5 myń dárigeri men 5 myńnan astam medbıkesiniń eńbekaqysy artpaq.
«Medbıke 100 myń teńge shamasynda alyp keldi. Maýsym aıynan bastap jalaqy 130 myń teńge boldy. Al keler jyly orta eseppen 20% artyp, 140-150 myń teńgeni quramaq», - dedi oblys basshysy.
Ustazdardyń eńbekaqysy 25% artpaq.
«Birinshi sanatty ustazdyń eńbekaqysy qazir 157 myń teńge. Qalada bir mólsherlememen jumys isteıtin muǵalim qazir osynsha alady. Al aýyldyq jerlerde qazir ustazdardyń eńbekaqysy - 197 myń teńge. Jańa jylda eńbekaqylary 25% artqannan keıin 227 myń teńgege jetpek», - dedi Qumar Aqsaqalov.
