SQO-da 1,5 mln teńgeniń astyǵyn urlamaq bolǵandardyń joly kesildi
PETROPAVL. QazAqparat – Soltústik Qazaqstan oblysynda polıtsııanyń mobıldi toby astyq urlyǵynyń ústinen tústi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Ǵ.Músirepov atyndaǵy aýdannyń polıtsııa bólimi qyzmetkerleriniń mobıldi toby sharýashylyqtardyń biriniń qyrmanynda jaryǵy óshirilgen «KamAZ» kóligin baıqaıdy.
Jedel ýákilderdiń kózinshe eki kombaın býnkerlerinen mashınaǵa kezekpen astyq tókken. Júk kóliginiń júrgizýshisi men eki kombaınshy sol jerde ustaldy.
Al polıtseılerdi kórisimen-aq qylmys ornynan qashyp úlgergen sheber-retteýshi jáne júk kóliktiń ıesi kelesi kúni ustaldy.
KamAZ-ǵa 10 tonnadan astam bıdaı artylǵan. Shyǵyn kólemi 1,5 mln teńgeni qurady. Atalǵan fakti «9rlyq» baby boıynsha tirkeldi.
Kúdiktilerdiń barlyǵy - Aıyrtaý aýdanynyń turǵyndary. Urlyq jasaǵandar bıdaı tıesili JShS-niń 51, 42 jáne 26 jastaǵy jumysshylary, olar ýaqytsha ustaý ızolıatoryna qamaldy.
«Ár aýdanda tájirıbeli qyzmetkerler – ýchaskelik ınspektorlar, jedel ýákilder, patrýldik polıtseıler bar mobıldik toptar quryldy. Olardyń basty mindeti – sharýashylyqtarǵa jańa astyqty urlyqsyz jınap alýǵa kómek kórsetý. 23 tamyzdan bastap oblysta «Astyq» jedel-profılaktıkalyq is-sharasy bastaldy. Operatsııa egis naýqany kezeńinde astyqtyń, janar-jaǵarmaıdyń, aýyl sharýashylyq tehnıkasynyń qosalqy bólshekteri urlyǵyna jol bermeý jáne olardy ashý úshin ótkiziledi. Polıtsııa qyzmetkerleri astyq tasymaldaıtyn kólikterdi tekseredi, mobıldik toptar jergilikti mańyzy bar joldardy patrýldeıdi. Bul is-shara bastalǵaly tirkelgen astyq urlaýdyń alǵashqy faktisi», - deıdi SQO PD bastyǵynyń orynbasary Rýslan Nazarov
