SQO-da 1,5 mln teńge para alǵan kóliktik baqylaý ınspektsııasynyń bas mamany 3 jylǵa sottaldy
Qylmystyq is jóninde búgin SQO Sybaılas jemqorlyqqa qarsy qyzmettiń jetekshisi Ernar Baıanǵazın habardar etti.
«Sotqa deıingi tergeý barysynda SQO boıynsha kóliktik baqylaý ınspektsııasynyń bas mamany Jasulan Muqanovtyń birneshe ret para alǵany anyqtaldy. Inspektsııanyń qyzmetkerleri 2020 jyldyń naýryz aıynda SQO aýmaǵyna zańsyz túrde burǵylaý qondyrǵysyn ótkizbek bolǵan Reseı azamatyn anyqtaıdy. Muqanov sheteldiktiń qondyrǵyny óńirge kommertsııalyq maqsatta kirgizgenin jáne taǵy birneshe ret ákeletinin bilip, ony óz paıdasyna sheshpek bolǵan», - deıdi Sybaılas jemqorlyqqa qarsy is-qımyl agenttiginiń SQO boıynsha departament jetekshisi Ernar Baıanǵazın.
Onyń aıtýynsha, Muqanov 2020 jyldyń 19 naýryzy kúni RF azamatyna ózin SQO boıynsha kóliktik baqylaý ınspektsııasynyń qyzmetkerimin dep tanystyryp, kásipkerge burǵylaý qondyrǵysyn oblys aýmaǵynda kedergisiz tasymaldaý jáne ári qaraı jalpy qamqorlyq kórsetý úshin aı saıyn 1 mln teńge syıaqy berip turýdy usynǵan.
«Іsi áshkere bolmaýy úshin jáne qylmystyq jaýapkershilikten qashqan Muqanov óz tanysyna istiń mánisin aıtpaı, ınternet telefonııa arqyly RF azamatyna basqa bir adamdardyń atyna rásimdelgen bank kartochkalarynyń rekvızıtterin jiberýdi ótinedi. Keıin sol adamdar arqyly parany alyp otyrýdy josparlaıdy.
Osylaısha talap etilgen paranyń belgili bir somasyn úshinshi adamdar arqyly alǵan Muqanov qorqýdy qoıyp, qalǵan somany – 1 mln teńgeni kásipkerden ózi almaq bolady», - deıdi Ernar Baıanǵazın.
2020 jyldyń 28 mamyrynda sybaılas jemqorlyqqa qarsy qyzmet jedel is-sharalardyń barysynda Jasulan Muqanovty para alyp jatqan jerinen ustady.
Osylaısha SQO boıynsha kóliktik baqylaý ınspektsııasynyń bas mamany J.Muqanov 2020 jyldyń sáýir men mamyr aralyǵynda ózi jáne basqa bireýlerdiń bank kartochkalaryna aýdarý arqyly 1,5 mln teńge para alǵan.
Petropavl qalalyq soty 2020 jyldyń 26 qarashasy kúni Muqanovqa qatysty úkim shyǵaryp, ony 3 jylǵa bas bostandyǵynan aıyrdy. Sondaı-aq ol endi ómir boıyna memlekettik laýazymdy qyzmetterge ornalasa almaıdy. 2021 jyldyń 20 qańtarynda sot úkimi zańdy kúshine endi.
«Sot qaraýynda Muqanovtyń tikeleı basshysyna qatysty sotqa deıingi tergeý jatyr. Oǵan da sybaılas jemqorlyq qylmysqa bardy degen aıyp taǵylǵan», - deıdi Ernar Baıanǵazın.