SQO-da 1,3 mln teńge para alǵan polıtseı jazaǵa tartyldy

NUR-SULTAN. QazAqparat - Soltústik Qazaqstan oblystyq polıtsııa departamenti bastyǵynyń orynbasarlary qatań sógis aldy. Bul týraly QR Sybaılas jemqorlyqqa qarsy is-qımyl agenttiginen málim etti, dep habarlaıdy QazAqparat.

Vedomstvo málimetinshe, SQO Shal aqyn aýdandyq polıtsııa bólimi bastyǵynyń birinshi orynbasary tótenshe jaǵdaı rejımi kezinde sheteldikti alyp júrgen azamattan olardyń arly-berli júrýine kedergi keltirmeý úshin 1,3 mln teńge para alǵan. Osyǵan oraı SQO polıtsııa departamenti bastyǵynyń buıryǵymen Shal aqyn aýdandyq polıtsııa bólimi bastyǵynyń birinshi orynbasary, polıtsııa maıory B.Shanıev qyzmetinen qýyldy jáne arnaýly ataǵynan aıyryldy. Al aýdandyq bólim bastyǵy, polıtsııa podpolkovnıgi qyzmetinen bosatyldy.

Munan bólek, Soltústik Qazaqstan oblystyq polıtsııa departamenti bastyǵynyń birinshi orynbasary polıtsııa polkovnıgi Q.Aıtbaev pen kadr jumys jónindegi orynbasary polıtsııa polkovnıgi Q.Dáýletbaev ákimshilik jaýapkershilikke tartylyp, qatań sógis aldy.