SQO-da 1,2 myńnan astam ata-ana balasy túnde júrgeni jaýapkershilikke tartyldy

PETROPAVL. QazAqparat – Soltústik Qazaqstan oblysynda ıývenaldy polıtsııa balalaryna durys qaramaıtyn 259 otbasyny esepke alǵan. Tártip saqshylary olarmen aldyn alý jumysyn júrgizedi, dep habarlaıdy QazAqparat.

Polıtsııa departamenti baspasóz qyzmetiniń aqparatynsha, demalys jáne oqý jylynyń basynda ıývenaldy polıtseıdiń jumysy kóp bolady. Reıd pen jedel-aldyn alý sharalary kóp ótkiziledi. Olardyń negizgi maqsaty – kámelettik jasqa tolmaǵandardyń jolda, sýda, túnde qaýipsizdigin qamtamasyz etip, balalar eńbegin paıdalanýǵa jol bermeý. Jyl basynan beri oblysta 67 jergilikti tekserý men 516 reıd ótkizildi. Sonymen qatara, ınspektorlar áleýmettik jelide aldyn alý jumysyn bastady.

«ıÝvenaldy polıtsııa jelisi boıynsha jyl basynan beri 1 938 tártip buzýshy anyqtalyp, jaýapqa tartylǵan. Petropavldyń ózinde ǵana kámelettik jasqa tolmaǵandar túnde zańdy ókilderinsiz júrgeni úshin 287 adam jaýapqa tartyldy. Oblys boıynsha jaýapqa tartylǵandar – 1 252 adam. Túrli quqyq buzýshylyq jasaǵan kámelettik jasqa jetpegen 109 adam jáne 160 otbasy esepke alyndy. Qazirgi kezde oblys boıynsha polıtsııa esebinde balalaryna durys qaramaıtyn 259 ata-ana tur», - dep baıandady polıtsııa departamenti bastyǵynyń birinshi orynbasary Qanat Aıtbaev.