SQO bıýdjetinen turaqtandyrý qoryn qalyptastyrýǵa 2,5 mlrd teńge bólindi

PETROPAVL. KAZINFORM – Soltústik Qazaqstan oblysyndaǵy turaqtandyrý qorynda qazirgi ýaqytta 12 myń tonnaǵa jýyq ónim bar. Áleýmettik mańyzy bar azyq-túliktiń basym bóligi – jergilikti taýar óndirýshilerdiń ónimi.

SQO-da «Soltústik» áleýmettik-kásipkerlik korporatsııasy» AQ turaqtandyrý qoryn qalyptastyrady. Bıyl áleýmettik mańyzy bar azyq-túlikti satyp alýǵa oblystyq bıýdjetten 2,5 mlrd teńge bólindi.

«Soltústik» áleýmettik-kásipkerlik korporatsııasy» AQ baspasóz qyzmetiniń málimetinshe, turaqtandyrý qoryna áleýmettik mańyzy bar azyq-túliktiń 14-i engen.

«10 qyrkúıektegi jaǵdaı boıynsha turaqtandyrý qorynda 11,7 myń tonnadan astam ónim jáne 6 myńǵa jýyq jumyrtqa bar. Onyń ishinde 4,5 myń tonna un, 263 tonna makaron ónimi, 400 tonnadan astam kúrish, 540 tonna qaraqumyq jarmasy, 880 lıtr kúnbaǵys maıy, 550 tonnaǵa jýyq tuz, 1400 tonna qant, 1250 tonnaǵa jýyq kartop, 480 tonnaǵa jýyq sábiz, 470 tonna qyryqqabat, 450 tonna pııaz, 570 tonnadan astam taýyq eti.

Oblysta óndirilmeıtin kúrish, qant, kúnbaǵys maıyn qospaǵanda, qalǵan ónim jergilikti taýar óndirýshilerden satyp alynady. Satyp alý qaryz, forvardtyq satyp alý jáne jetkizý sharttaryn jasasý arqyly júzege asyrylady», - deıdi mamandar.

Agroqurylymdar turaqtandyrý qoryn jańa pisken kókónistermen de ýaqtyly qamtamasyz etip keledi. Ónimder birden saýda oryndaryna túsedi.

Qys mezgilinde kókónister «Radýga» JShS zamanaýı kókónis qoımasynda saqtalynady. Nysanda kókónisterdi mamyr-maýsymǵa deıin buzbaı jetkizýge múmkindik beretin qajetti jaǵdaı, sonyń ishinde temperatýra, jeldetý bar.

Ónimder qoımalardan turaqtandyrý qorynyń saýda oryndaryna kún saıyn, sýpermarketterge – aptasyna úsh ret, úı astynda ornalasqan dúkenderge aptasyna eki ret jetkiziledi. Turaqtandyrý qorymen aýyldyq dúkender de jumys isteıdi. Ótinimderdi aýdandardaǵy kásipkerlik bólimderi qabyldaıdy.

Jalpy «Soltústik» ÁKK» AQ barlyǵy segiz saýda orny bar, onyń jeteýi Petropavlda jáne bireýi Qyzyljar aýdanynyń Beskól aýylynda ornalasqan. Mundaǵy baǵa anaǵurlym arzan, máselen kúrish - 427 teńgeden, kúnbaǵys maıy 460 teńgeden, qaraqumyq jarmasy 240 teńgeden saýdalanyp jatyr.

Turaqtandyrý qorynan alynǵan ónimdi saýda oryndary kelisim boıynsha 15% aspaıtyn ústememen ǵana satady.

Buǵan deıin Aqtóbe oblysyndaǵy turaqtandyrý qorynyń aınalym qarjysy 1,9 mlrd teńgeni quraǵandyǵyn jazǵan edik.