SQO botanıkalyq baǵyndaǵy elikter qoryqqa jiberildi

PETROPAVL. QazAqparat – Soltústik Qazaqstan oblysynda botanıkalyq baqtaǵy elikterdiń bir bóligi tabıǵat aıasyna jiberildi. Olar munda túrli sebeppen jetkizilip, mamandardyń kútiminde bolǵan edi, dep habarlaıdy QazAqparat tilshisi.

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, Petropavl botanıkalyq baǵyna ótken jyldyń maýsym aıynda eliktiń laǵy ákelindi.

Ony Qyzyljar aýdany Penkovo aýylynyń mańyndaǵy avtomobıl jolynyń janynda erli-zaıypty baıqap qalǵan.

Laqtyń anasyn kólik soqqan eken.

Botanıkalyq baqta janýardyń tóline qajetti kútim jasaldy, orman sharýashylyqtary ony qajetti jemshóppen qamtydy, nátıjesinde ol aıaǵyna turdy.

«Ótken qysta óńirde sibir elikteri tolyp ketti. Janýarlar eldi mekenderge kirip, ortalyq kóshelerde júrdi. Keıbiri qańǵyrǵan ıtter men brakonerlerge jem boldy. Jabaıy janýarlardy qalanyń ártúrli aýdandarynda beınege túsirip úlgerdi. Petropavl qalasy boıynsha ǵana adasyp nemese jaraqattanyp qalǵan elikterdi kórgen turǵyndardan 32 shaqyrtý tústi. Olardyń kóbi ustaldy. Birshamasy botanıkalyq baqqa ákelindi. Endi kóktiń shyǵýymen biz olardy bostandyqqa jiberip jatyrmyz», - deıdi basqarma qyzmetkerleri.

Mamandar Sogrov memlekettik tabıǵı qoryǵynda ornalasqan qaraǵaıly ormannyń aýmaǵyna úsh elikti bosatyp jiberdi.

Onyń bireýi - ótken jazda anasy ólip, baqqa jetkizilgen tól.

«Mamyr-maýsym aılarynda elikter tóldeıdi. Osy ýaqytta olar keıde laqtaryn qysqa ýaqytqa jalǵyz qaldyrady, biraq sodan keıin oralyp, tólderin ońaı tabatynyn aıta ketken jón. Sondyqtan ormanda eliktiń laǵyn kórseńizder olarǵa jaqyndamaı, tabıǵatty qorǵaý uıymyna habarlaýyńyzdy suraımyz», - deıdi basqarma qyzmetkerleri.