SQO Bogolıýbovo eldi mekeninde órt sóndirý beketi ashyldy
PETROPAVL. QazAqparat – Soltústik Qazaqstan oblysynyń Bogolıýbovo eldi mekeninde úsh aýylǵa qyzmet kórsetetin jańa órt sóndirý beketi ashyldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, jańadan ashylǵan órt sóndirý beketi Bogolıýbovo selosynan basqa jaqyn mańdaǵy Voznesenka jáne Nadejka eldi mekenderin qamtıdy. Bul aýyldarda qazir 2 myń 307 adam turyp jatyr. Memlekettik órtke qarsy qyzmet organdarynyń órt sóndirý beketterin qurý boıynsha 2019-2020 jyldarǵa arnalǵan is-sharalar jospary bar.
Órt sóndirý beketiniń saltanatty ashylý rásimine departament basshylyǵy, Qyzyljar aýdandyq ákimdigi ókilderinen basqa aýyl turǵyndary da qatysty.
«Oblystyń shalǵaı eldi mekenderinde órt sóndirý beketteriniń ashylýy órt sóndirý kezinde mamandardyń jumysyn jeńildetip qana qoımaı, olardyń jumys tıimdiligin arttyrady. Oqıǵa ornyna jyldam jetken órt sóndirýshilerdiń turǵyndardyń ómirine arasha túsip, olardyń dúnıe-múlkin aman alyp qalýǵa múmkindigi artady», - dedi azamattyq qorǵaý polkovnıgi Nurlan Atyǵaev.
Qazirgi tańda oblystyń eldi mekenderinde 35 órt sóndirý beketteri ornalasqan.
