SQO bıyl ónerkásipke 287 mlrd teńge ınvestıtsııa tartýdy josparlap otyr
SQO ákimi baspasóz qyzmetiniń málimetinshe, óńirde jalpy somasy 237 mlrd teńgeniń 50 ınvestıtsııalyq jobasy qurylǵan. Júzege asqan jaǵdaıda qosymsha 5 myń jumys orny ashylmaq.
«7 aıdyń qorytyndysy boıynsha oblysta ónerkásip salasy 8,8% artty. Bul kórsetkishti biz eń keminde 10% jetkizýimiz qajet. Jumystar istelip jatyr. Nátıjesinde Prezıdent qoıǵan mindet – óńdeýshi ónerkásip óndirisiniń kólemin 1,5 esege arttyrý mejesine bes jylda emes, aldaǵy úsh jylda qol jetkizemiz», - deıdi SQO ákimi Qumar Aqsaqalov.
Óńirdegi iri jobalardyń biri - «Tin One Mining» AQ-nyń ken baıytý kombınatynyń qurylysy. Aıyrtaý aýdanynda salynatyn kásiporyn jylyna 10 myń tonna qalaıy óndirmek. Joba quny – 100 mlrd teńge. Sondaı-aq volfram ken ornyn óńdeý josparlanǵan.
«Qazaqstanda transformator shyǵaratyn tanymal ALAGEUM ELECTRIC Petropavlda elektrtehnıkalyq ónim shyǵarmaq. Onyń buıymdary 95% syrtqy naryqqa baǵyttalǵan. Qurylys jumystary bastalyp ketti. Túrikter lamınattalǵan fanera óndirisin qolǵa alady. Zaýyt iske qosylǵasyn jylyna 18 myń tekshe metr ónim shyǵarady. «Maslo Del», «Molochnyı soıýz» sekildi iri kásiporyndardyń jańǵyrtý jumystarynan keıin qýattylyǵy artady. Bul jobalardyń barlyǵy óńirdi damytýǵa óz úlesin qosady», - deıdi oblys ákimi.
SQO-da shaǵyn jáne orta bıznes te qarqyndy damyp keledi.
«Prezıdent shaǵyn jáne orta bıznesti damytý nátıjesinde 2025 jyly olardyń jalpy ishki ónimdegi úlesi 35% jetýi tıis dedi. Jyldyń qorytyndysy boıynsha oblys qazirdiń ózinde óńirler arasynda aldyńǵy oryndarda keledi. Sońǵy 5 jylda 6,2% artyp, 2019 jyly 31,4% besinshi orynǵa turaqtady», - deıdi Qumar Aqsaqalov.
Jyldyń qorytyndysy boıynsha bıyl oblysqa 287 mlrd teńge tartý josparlanǵan. Shaǵyn jáne orta bızneske «Eńbek», «Qarapaıym zattar ekonomıkasy», «Bıznestiń jol kartasy-2025» memlekettik baǵdarlamalary aıasynda qoldaý kórsetilip jatyr.
Sonyń ishinde kásiporyndarǵa qajet ınfraqurylym memleket esebinen tartylady.
