SQO bir qysta 370 myń tekshe metrge deıin otyn jaǵady
PETROPAVL. QazAqparat – Soltústik Qazaqstan oblysynda orman sharýashylyqtary bıyl otyn baǵasyn ósirgen joq. Aǵashtyń tekshe metri 2 myń teńgeden saýdalanyp jatyr, dep habarlaıdy QazAqparat tilshisi.
SQO tabıǵı resýrstar jáne tabıǵatty paıdalanýdy retteý basqarmasynyń málimetinshe, óńirde basqarmaǵa qaraıtyn 12 orman sharýashylyǵy bar. Budan basqa «Kókshetaý» memlekettik ulttyq parkiniń 3 fılıaly jumys isteıdi. Olardyń barlyǵy qysqy maýsymǵa qajet otyndy ázirleıdi. Bul sharýashylyqtarda aǵashtyń tekshe metri 2 myń teńge. Baǵa byltyrǵy deńgeıde qaldy.
Qyzyljar orman sharýashylyǵy búgingi kúnge deıin 3 myń tekshe metr qaıyń aǵashyn qulatty. Jumys mamyr aıynda bastalǵan. Otyn daıyndaý qazan aıyna deıin jalǵaspaq.
«Otynǵa negizinen qyzýy jaqsy qaıyń qoldanylady. Bıyl jospar boıynsha 6 myń tekshe metr otyn ázirleýimiz qajet. Ol jaqyn mańdaǵy Beskól, Trýdovaıa Nıva, Novokamenka jáne Chapaı eldi mekenderiniń turǵyndaryna satylady. Jumys kestege saı júrip jatyr», - deıdi sharýashylyqtyń orman sheberi Serik Mýhanov.
Orman sharýashylyqtarynan jeke kásipkerler de aǵash jazdyryp alyp, turǵyndarǵa daıyn otyndy satyp jatyr. Olardyń baǵasy ótken jylmen salystyrǵanda aıtarlyqtaı kóterilgen. Tekshe metri – 7-8 myń teńge shamasynda.
«Jekemenshikter baǵany ózderi qoıady. Olar jumys kúshin, ara qashyqtyqty, tehnıkany esepke alady. Bıyl qymbattaǵan janar-jaǵarmaı da baǵanyń ósýine áser etti.
Jalpy óńirde otyndy paıdalaný bir deńgeıde saqtalyp otyr. SQO qys maýsymynda 350-370 myń tekshe metr aǵashty otyn retinde qoldanady», - deıdi SQO tabıǵı resýrstar jáne tabıǵatty paıdalanýdy retteý basqarmasynyń bas mamany Qaırolla Baıteńizov.
