SQO: Bıyl «Serpin» baǵdarlamasymen eki myńnan astam jas bilim aldy
PETROPAVL. KAZINFORM – Bıyl «Serpin» baǵdarlamasynyń bastalǵanyna on jyl. Osy aralyqta Soltústik Qazaqstan oblysynda 2 237 adam bilim aldy.
2014 jyly ashylǵan «Serpin-2050» baǵdarlamasynyń maqsaty - elimizdiń jumys kúshi artyq óńirlerindegi jastardy oqytý jáne jumysqa ornalastyrý boldy. Jastar Soltústik Qazaqstan oblysyndaǵy kolledjderde, joǵary oqý ornynda tegin oqýǵa múmkindik aldy.
«2022 jyldan bastap «Serpin-2050» baǵdarlamasynyń ataýy ózgertildi. Belgili bir kvotalar boıynsha stýdentter qabyldaıtyn boldyq. «QR Úkimeti aıqyndaǵan óńirlerge qonys aýdarýshy aýyl jastary» dep atalady. Osy kvota boıynsha búginde 80 stýdent bilim alyp jatyr.
Jalpy, 2014 jyly 138 stýdent oqýǵa tústi. Jastardyń 80 % - qazirgi Túrkistan oblysynan boldy. Qalǵandary Qyzylorda men Almaty, Mańǵystaý oblystarynan. Sodan beri, ıaǵnı 2014-2022 jyldar aralyǵynda ýnıversıtette 1624 stýdent oqydy. Qazirgi ýaqytta osy baǵdarlamamen 143 stýdent oqyp jatyr. Sonyń 72-si – 4 kýrsta oqıdy. 71-i – 3 kýrsta oqıdy», - deıdi Kozybayev university basqarma tóraǵasy-rektordyń keńesshisi Janar Talaspaeva.
Qazir batystan jáne halqy tyǵyz ornalasqan óńirlerden keletin jastarǵa arnaıy kvota bar. Bul kvotamen jergilikti ýnıversıtette 14 stýdent bilim alyp jatyr.
«Osy ýaqytqa deıin «Serpin» baǵdarlamasymen ońtústik óńirlerden kelip oqyǵan stýdentter boıynsha statıstıkaǵa júginetin bolsaq, bul jastar kóbine pedagogıkalyq mamandyqtardy tańdaıdy. Sonymen qosa ınjenerlik, qurylys, aýyl sharýashylyǵy baǵytyndaǵy jáne aqparattyq-kommýnıkatsııalyq tehnologııalar mamandyqtary boıynsha oqıdy.
«Serpin», jalpy kvotamen oqyp jatqan stýdentterge bar jaǵdaı jasalǵan. Olar 100 % jataqhanamen qamtylady. Qazir 5 jataqhanamyz bar, qosymsha taǵy ekeýi salynyp jatyr. Sondyqtan bizde stýdentter arasynda jatyn orynmen aıtarlyqtaı másele joq. Desek te, kvotamen túsken jastar birinshi kezekte qamtylady», - deıdi Janar Talaspaeva.
Mamannyń aıtýynsha, budan basqa temirjol kóligimen baryp-kelý – jol shyǵyny óteledi. Shákirtaqy alady. Al oqý bitirgennen keıin osy óńirde jumys isteýge qalatyn bolsa, olardy jumyspen, turǵyn úımen qamtamasyz etý máseleleri de sheshiledi.
«Sońǵy 4-5 jyldan beri bul baǵdarlamamen oqyǵan stýdentter bizdiń óńirde qalýǵa mindettelmeıdi. Biraq Aqmola, Qaraǵandy, Qostanaı, Ulytaý, Shyǵys Qazaqstan oblystarynyń aýmaǵynda olar jumysqa ornalasa alady. Taǵy da statıstıkalyq derekke súıener bolsaq, oqý bitirgen stýdentterdiń 65 % jumysqa ornalasqan. Óıtkeni olar jumysqa ornalasqan ýaqytta bizge anyqtama qaǵazyn jiberýge mindetti. 25 % magıstratýraǵa oqýǵa túsedi. 10 % júktilikke nemese 3 jasqa deıingi nárestesiniń bolýyna baılanysty jumystan bosatylady. Sondaı-aq turmysqa shyǵyp, jubaılary joǵary bilimdi bolsa, onda kúıeýi jumysqa ornalasqan óńirge attanady», - deıdi ýnıversıtettiń basqarma tóraǵasy-rektordyń keńesshisi Janar Talaspaeva.
SQO bilim basqarmasy baspasóz qyzmetiniń málimetinshe, «Serpin-2050» áleýmettik jobasy aıasynda óńir kolledjderine Almaty, Túrkistan, Jambyl, Qyzylorda, Mańǵystaý oblystarynan 585 stýdent oqýǵa túsken, onyń 470-si oqýdy aıaqtasa, 69 adam SQO-da qalyp, 61-i jumysqa ornalastyryldy. 8 jas jergilikti ýnıversıtette oqýyn jalǵastyrdy.
Jastar oblystyń 7 kolledjiniń bazasynda aýyl sharýashylyǵy, qurylys, energetıka, bilim berý, qyzmet kórsetý salalary - 15 mamandyq boıynsha bilim aldy.
