SQO: bıyl ótken jylmen salystyrǵanda 5 ese artyq «sıntetıka» tárkilengen
PETROPAVL. KAZINFORM – Soltústik Qazaqstan oblysynda tártip saqshylary balalar men jasóspirimderde esirtkige qarsy ımmýnıtetti qalyptastyrýǵa baǵyttalǵan túsindirý aktsııalaryn ótkizip jatyr. Óıtkeni jastar arasynda jeńil jolmen aqsha tabý úshin esirtki taratatyndar sany kóbeıip keledi.
SQO Polıtsııa departamenti baspasóz qyzmetiniń málimetinshe, Shal aqyn aýdanynda bıyl ósimdik tektes esirtkini jeke tutyný maqsatynda saqtaýdyń úsh faktisi tirkelgen. Tártip saqshylary «Kuleke Batyr» dene shynyqtyrý-saýyqtyrý kesheniniń bazasynda jas sportshylarmen kezdesti. Balalarǵa tyıym salynǵan zattardy qoldanýdyń jáne taratýdyń saldary jaıtsynda aıtylyp, esirtki aınalymyna qatysty kez kelgen aqparatty ata-analaryna nemese polıtseılerge «102» telefony arqyly habarlaý kerektigin eske saldy. Kezdesý sońynda balalarǵa kitapshalar men jadynamalar taratyldy.
SQO Polıtsııa departamenti bastyǵynyń orynbasary Asqar Muhametqalıevtiń aıtýynsha, esirtki qylmysyna qarsy is-qımyl bólimsheleriniń jumysynda negizgi basymdyq sıntetıkalyq esirtkige qarsy kúreske beriledi. Jyl basynan beri oblysta 5 kg 611 gramm sıntetıkalyq esirtkiler tárkilengen. Bul ótken jyldyń osy kezeńimen salystyrǵanda shamamen 5 ese kóp.
Esterińizge salaıyq, bıyl SQO-da 17 jastaǵy jasóspirim jigit 5 jylǵa bas bostandyǵynan aıyryldy. Ol esirtki satýmen aınalysatyn ınternet-dúkenge jumys istep kelgen.
