SQO: bıyl egin oraǵyn sýyq aýa raıy men dızel sapasy tejep tur
PETROPAVL. KAZINFORM — Soltústik Qazaqstan oblysynda ázirge egin oraǵy aıaqtalǵan joq.
Byltyr jaýyn-shashyn dıqandarǵa qolbaılaý bolsa, bıyl sýyq aýa raıy oraqqa kedergi keltirip jatyr. Sharýalardyń aıtýynsha, jeńildetilgen baǵamen berilgen dızel otyny klımatqa beıimdelmegen bolyp shyqty.
SQO aýyl sharýashylyǵy jáne jer qatynastary basqarmasynyń málimetinshe, kóktemgi egiske jáne oraqqa qajet dızel otynynyń kólemin anyqtaý úshin jylda jeltoqsan aıynda sharýashylyqtardan ótinimder qabyldanady. Sonyń negizinde bıyl óńirge 120 myń tonna shamasynda dızel otyny bólindi. Onyń 68,6 myń tonnasy kúzgi dala jumystaryna arnalǵan.
— Arzandatylǵan suıyq otynnyń lıtri 254 teńge. Jalpy operator nemese aýyl sharýashylyǵy ónimin óndirýshi men resýrs tasymaldaýshy arasyndaǵy otyn sapasyna qatysty daý azamattyq-quqyqtyq tártipte sheshilýi tıis.
Sonymen qatar, Energetıka mınıstrligine birneshe ret hat joldandy. Onda bizdiń óńirdiń ereksheligi eskerilip, tómen temperatýra men joǵary ylǵaldylyq jaǵdaıynda egin jınaý jumystaryna jaraıtyn dızel otyny qajet ekeni aıtyldy, — deıdi basqarma basshysy Dáýren Toqýjınov.
Buǵan deıin Aqmola oblysynyń fermerleri dızel otynynyń sapasyna shaǵymdanyp, sýyqtan suıyq otynnyń parafınge aınalyp jatqanyn aıtqan edi.
Keıin QazMunaıGaz fermerlerge berilgen dızel otynyna qatysty jaǵdaıdy túsindirdi.