SQO bıyl 3 144 qonys aýdarýshyny qabyldaıdy

PETROPAVL. KAZINFORM – Soltústik Qazaqstan oblysynda byltyr 30 myń adam áleýmettik qoldaýǵa ıe boldy. Al múgedektigi bar jandarǵa 2,4 mlrd teńgeniń kómegi kórsetildi.

SQO ákiminiń orynbasary Júsip Jumaǵulovtyń aıtýynsha, óńirde turǵyndardy áleýmettik qoldaýǵa keshendi sharalar qabyldanǵan. 

Sonyń ishinde múgedektigi bar adamdar basty nazarda. Byltyr olarǵa jeke kómekshilerdiń qyzmetteri men sanatorııge joldamalardy qosa alǵanda, 10 myńnan astam tehnıkalyq ońaltý quraldary alyndy. Bıyl qyzmettiń bul túrin 11 myńǵa deıin arttyrý josparlanǵan. 

- Úkimettiń tapsyrmasyna sáıkes óńirde daǵdarystyq sanattaǵy otbasylardy azaıtý boıynsha jumystar belsendi júrgizilip jatyr. Naqty jumystyń arqasynda D jáne E sanatyndaǵy otbasylar sany 48,9 myńnan 39,4 myń adamǵa deıin azaıdy. Osy jyly sanyn taǵy 7% tómendetý kózdelgen.

Qazir óńirdegi jumyssyzdyq deńgeıi - 4,5%. 2024 jyly jospar boıynsha 4 512 jańa jumys orny quryldy, bıyl taǵy 4 291 jumys ornyn qurý mindeti tur, - deıdi Júsip Jumaǵulov.

Oblys ákimi orynbasarynyń aıtýynsha, byltyr oblysqa jumys kúshi artyq óńirlerden 2 547 qonys aýdarýshy keldi. Barlyq kelgen azamattarǵa 1,8 mlrd teńge mólsherinde memlekettik qoldaý sharalary kórsetildi. Onyń ishinde 1 mlrd teńgege turǵyn úı satyp alý úshin 278 ekonomıkalyq utqyrlyq sertıfıkaty berildi. Eńbekke qabiletti azamattardyń 78% jumysqa ornalastyryldy. Óńir bıyl taǵy 3 144 qonys aýdarýshyny qabyldaýdy josparlap otyr.

Byltyr Túrkistan oblysynan 300-ge jýyq otbasy, 1 200-ge tarta azamat qonys aýdarǵan.

Al 2025 jyldyń naýryzynan qonys aýdarýshylarǵa memlekettik qoldaý sharalaryn kórsetý qyzmetteri avtomattandyrylmaqshy.