SQO Beskóldegi bala bir jyl boıy oıyn alańyn jóndetkize almaı júr
PETROPAVL. KAZINFORM — Soltústik Qazaqstan oblysy Beskól aýylynyń kishkentaı turǵyny Ildar Muhamedshın ákesi Rınatpen birge eldi mekendegi birqatar máseleni kóterip júr.
Ildardyń áleýmettik jelidegi paraqshasynan jergilikti ákimdikten oıyn alańyn jóndep berýdi suraǵan beınerolıkterin kórýge bolady. Ildardyń aıtýynsha, mundaǵy átkenshekter synǵan, keıbiri qaýipti jaǵdaıda tur. Syry túsip, endi biri qulaýǵa shaq.
Ildardyń jasy segizde. Beskóldegi № 3 mektepte qazaq synybynda oqıdy. Ákesi Rınattyń aıtýynsha, otbasy aýylǵa osydan 3 jyl buryn kóship kelgen. Qastaryndaǵy oıyn alańynyń jaǵdaıy kóńilden shyqpaı, jergilikti ákimdikten jóndep berýdi ótingen.
— Jaýap bolmaǵannan keıin byltyrdan eOtinish arqyly suraý sala bastadyq. Amalsyzdan keledi, birdeńe istegendeı bolady.
Sharýashylyq tásil degen bar olarda, ıaǵnı bireýdi jiberip, qolda bar materıalmen jumysty istetedi. Biraq júrdim-bardym istegendikten, onysy bir aıǵa jeter-jetpes qaıta buzylady.
Bıyl tamyz aıynda «Taza Qazaqstan» aktsııasyn ótkizdi. Shala-sharpy syrlaǵandaı boldy. Aınalasynyń shóbin shapty. Biraq, bul olardyń mindeti ǵoı, eshqandaı aktsııasyz-aq. Oıyn alańyndaǵy dárethanany jóndemedi, esigi sol qalpy qulaıyn dep tur. Qoqys tastaıtyn ydys jaz boıy jóndelmedi, — deıdi Rınat Muhamedshın.
Aýyl turǵynynyń aıtýynsha, byltyr onyń uıymdastyrýymen balalar oıyn alańynda senbilik ótkizgen.
— Qaptardy, qolǵaptardy satyp ákelip, balalarmen birge jınap shyqtyq. Taǵy da uıymdastyra alamyz, qajet bolsa, biraq ákimdik te bizdiń máselelerimizge kóńil bólse deımiz.
Bir jaýaptary bar «qarjy joq» degen. eOtinish arqyly kelgen jaýaptarynda sońǵy úsh jyl boıy bul maqsatqa qarjy bólinbegen.
Sol sebepti biz ózimiz «baǵa usynysyn» jasadyq. Oıyn alańyn jasaıtyn almatylyq kompanııany da taptyq. Bári daıyn tur. Jańasyn salýǵa 30 mln teńge kerek. Aýdan bıýdjeti úshin bul túk emes qoı, — deıdi aýyl turǵyny.
Rınat Muhamedshınniń aıtýynsha, Beskól aýyly boıynsha balalardyń bes oıyn alańy bar. Biraq bireýi de talapqa saı kelmeıdi.
Buǵan deıin SQO-da túlki keshqurym mektepten kele jatqan balaǵa shapqanyn jazǵan edik.