SQO Beskól aýylynda órt shyǵyp, eki gaz ballony jaryldy
SQO Tótenshe jaǵdaılar departamentiniń málimetinshe, búgin saǵat 9.26 mınýt ketkende 101 pýltine Beskól aýylyndaǵy Lesnaıa-Lýgovaıa kóshesinde órt shyqqandyǵy jóninde habar tústi. Oqıǵa ornyna №12 órt sóndirý bólimshesiniń eki tehnıkasy jiberildi. Mamandar kelgen ýaqytta úıdiń qasyndaǵy ýaqytsha nysan, garajy men monshasy otqa oranyp úlgerip, mundaǵy eki gaz ballony jarylǵan. Olardyń barlyǵy bir shatyr astynda bolǵan. Osylaısha 240 sharshy metr janyp ketti. Órttiń shyǵý sebepteri anyqtalyp jatyr.
Taǵy bir órt keshe Petropavlda boldy. Úıler tyǵyz ornalasqandyqtan oqıǵa ornyna birden úsh órt sóndirý bólimderiniń mamandary jumyldyryldy.
«Saǵat 12.08 mınýt ketkende 101 pýltine M.Áýezov kóshesi, 82 úıde órt shyqqandyǵy jóninde habar tústi. Jalyn jaıylmaýy úshin órtke ekinshi deńgeı berildi. Órt sóndirýshiler 5 mınýttyń ishinde jetti, olar kelgen kezde eki qabatty úıdiń shatyry jáne úıdiń kire berisi otqa oranyp úlgergen eken. Jalyn 96 sharshy metr aýmaqqa jaıyldy. Aldyn ala boljam boıynsha, órt peshti durys qoldanbaýdan shyqqan. Zardap shekkender joq, órt saǵat 13.22 mınýt ketkende tolyq sóndirildi», - deıdi SQO tótenshe jaǵdaılar departamenti bastyǵynyń orynbasary Oral Ábdirahmanov.
Jalpy, jyl basynan oblysta 600-ge jýyq órt tirkelip, otta 41 adam qaza tapty, 37 adam túrli dene jaraqatyn aldy. Taǵy 6 adam ýly gazdan ýlanyp kóz jumsa, 15 adam jaraqattandy. Órtten kelgen materıaldyq zalal – 229 mln teńge shamasynda.
