SQO Beskól aýylynda 40 otbasy jańa páterge qol jetkizdi
PETROPAVL. QazAqparat – Soltústik Qazaqstan oblysy Beskól aýylynda 40 otbasy Táýelsizdik kúni qarsańynda baspanaly boldy, dep habarlaıdy QazAqparat tilshisi.
Búgin Qyzyljar aýdanynda kezekte turǵan 40 otbasyǵa páter kilti tabys etildi. Jaqsy jańalyqpen SQO ákimi Qumar Aqsaqalov áleýmettik jelidegi jeke paraqshasynda bólisti.
«Bul Beskólde salynǵan alǵashqy 5 qabatty úı. Kelesi jyly janynan dál sondaı taǵy bir kóp qabatty úı boı kóteredi.
Aýdandarda bıyl kezekte turǵandar úshin 7 kóp qabatty úı salyndy. Jalpy, bıyl 300 myńnan astam sharshy metr paıdalanýǵa beriledi. Bul 3 myń páter. 11 myń adam qonys toıyn toılaıdy. Kelesi jylǵa 400 myń sharshy metr baspana salamyz degen maqsat qoıdyq. Qazirdiń ózinde oblys ortalyǵynda kóp páterli 32 turǵyn úı salynyp jatyr. Osynyń arqasynda kóptegen soltústikqazaqstandyqtar jańa baspanaǵa ıe bolady», - dep jazdy Qumar Aqsaqalov. 
Beskól aýylyndaǵy kópqabatty úıdiń qurylysy byltyr tamyzda «Nurly jer» baǵdarlamasy aıasynda bastaldy. Jalpy aýmaǵy shamamen 3 myń sharshy metr. Páter kiltteri jetim jáne ata-ana qamqorlyǵynsyz qalǵan balalarǵa, turmysy nashar jáne kópbalaly otbasylarǵa tabystaldy.
