SQO basshysy azyq-túlik baǵalaryn tekserýge ýáde berdi
PETROPAVL. QazAqparat - Soltústik Qazaqstan oblysynda taǵy da taýar ınterventsııasy engizildi, dep habarlaıdy «QazAqparat» HAA tilshisi.
Kásipkerlik jáne týrızm basqarmasynyń basshysy Quralaı Jarovanyń bergen málimetterine qaraǵanda, oblys bazarlaryna 500 tonna kartop, taǵy 100 tonnadan pııaz, qyryqqabat jáne sábiz shyǵarylady. Interventsııa bazardy kókónis ónimderimen molyqtyrý jáne osy sanattaǵy taýarlar baǵasynyń artyp ketýine jol bermeý maqsatynda ótkizilip jatyr.
«Ótken aptada áleýmettik mańyzy bar taýarlar baǵasynyń ındeksi 98,7%-ti qurady. Kókónisterdiń baǵasy tómendegen. Birinshi sanattaǵy jumyrtqanyń baǵasy 175 teńgeden 180 teńgege deıin artqan. Oblystaǵy qus fabrıkalarymen baǵany kótermeý týraly memorandýmǵa qol qoıyldy. Ortasha baǵa 180 teńge boldy. Qus fabrıkalarynyń fırmalyq saýda oryndaryndaǵy jumyrtqanyń kóterme saýda baǵasy - 175 teńge, al bólshek saýdada - 185 teńge», - deıdi Quralaı Jarova.
Ol oblysty jumyrtqanyń baǵasy Qazaqstannyń basqa óńirlerine qaraǵanda arzandaý ekenin de tilge tıek etti.
Quralaı Jarovanyń aıtýynsha, Qostanaıda on jumyrtqa 200 teńge, Pavlodarda 205 teńge turady. Al Qazaqstandaǵy jumyrtqanyń ortasha baǵasy 231 teńgeni quraıdy. Kásipkerlik jáne týrızm basqarmasyndaǵylar jumyrtqanyń osy baǵasyn jyl sońyna deıin ustap turýǵa úmit etip otyr. SQO ákiminiń aıtýynsha, baǵa jyl basynda da ózgermeýi tıis.
«Qazir osynyń ústinde jumys isteý qajet. Mendegi málimetter baǵanyń sál basqasha ekenin kórsetedi. Men tek basqarmalardan emes, jurtshylyqtan, áleýmettik jelilerden - búkil derekkózderden málimetter alamyn. Baǵany apta saıyn qadaǵalap otyrý jáne resmı statıstıkany tekserý qajet», - deıdi Qumar Aqsaqalov.
