SQO balabaqshalary qalypty jumysyn jalǵastyrýda
PETROPAVL. QazAqparat – Soltústik Qazaqstan oblysynda mektepke deıingi bilim berýmen 20 myń bala qamtylǵan. Búginde olardyń 5 myńnan astamy ǵana balabaqshalarǵa kúndelikti baryp júr, dep habarlaıdy QazAqparat tilshisi.
SQO Bilim basqarmasynyń málimetinshe, elde jarııalanǵan tótenshe jaǵdaıǵa qaramastan, óńirdegi balabaqshalar men shaǵyn ortalyqtar shtattyq rejımde jumys istep jatyr. Alaıda ata-analar balalaryn óz qalaýyna qaraı ákele alady. Balabaqshalardaǵy oryndary saqtalyp qalmaq.
Mamandardyń aıtýynsha, mektepke deıingi bilim berý mekemelerine baratyn búldirshinderdiń sany búginde azaıǵan. Dúısenbi kúni 8 myńnan astam bala kelse, búgin ata-analar tek 5 427 búldirshindi ákelgen. Bul - barlyq kelýi tıis balanyń 27,5% ǵana.
«Balabaqshalarǵa kúndelikti monıtorıng júrgiziledi. Juqpaly ınfektsııanyń aldyn alý maqsatynda birqatar is-sharalar qolǵa alyndy. Mindetti túrde tańerteńgilik fıltr júrgiziledi. Bólmelerdi kvartstep, ylǵaldy jýyp-jııý sanyn arttyrdyq. Barlyq mekemeler dezınfektsııalyq qural-jabdyqpen tolyq qamtyldy», - deıdi SQO Bilim basqarmasynyń jetekshisi Gúlmıra Raıymbekova.
Búginde oblysta 20 myńǵa jýyq balaǵa arnalǵan 489 mektepke deıingi bilim berý mekemesi jumys isteıdi.
