SQO Aıyrtaý aýdanynda sút fermasy iske qosyldy
PETROPAVL. QazAqparat – Soltústik Qazaqstan oblysy Aıyrtaý aýdanynda jańa sút fermasy ashyldy, bul – óńirde sońǵy ýaqytta ashylǵan osymen 12-shi ferma, dep habarlaıdy QazAqparat tilshisi.
SQO ákimi Qumar Aqsaqalov Aıyrtaý aýdanynda iske qosylǵan fermanyń jumysyn kórdi.
«Oblystyń barlyq iri aýyl sharýashylyǵy taýaryn óndirýshileri etti nemese sútti mal ósirýdi qolǵa alýy kerek. Bul jergilikti atqarýshy bılik pen fermerlerge ortaq mindet. Jobalardy júzege asyrýǵa memleketten úlken qoldaý bar. Birlesken jumys óz nátıjesin qazirden berip jatyr», - deıdi óńir basshysy.
Sońǵy ýaqytta oblysta 12 zamanaýı sút fermasy paıdalanýǵa berildi. Solardyń biri keshe ǵana Aıyrtaý aýdanyndaǵy «Arna» fermerlik sharýashylyǵynda ashyldy.
«Búginde sút óndirý tabysty bıznesterdiń biri. Oblystyń áleýeti joǵary. Respýblıkadan sút fermalaryn salýǵa, osy salany damytýǵa bıyl da qarjy bólinedi. Jańa jyl qarsańynda respýblıkalyq bıýdjettik komıssııa keshendi jospardyń ekinshi kezeńin qabyldady. ıAǵnı óńirde bul baǵyttaǵy jumystar jalǵasady. Bul biz úshin asa mańyzdy. Nátıjesinde qosymsha jumys oryndary paıda bolady, salyq túsedi, sút óńdeıtin kásiporyndarǵa shıkizat bolady jáne eksportqa shyǵarýǵa múmkindik alamyz. Tabıǵı ónimge suranys qashan da joǵary», - dedi Qumar Aqsaqalov.
Qazir SQO-da 6 sút kesheniniń qurylysy jalǵasýda. Bıyl taǵy 10 fermanyń qurylysy bastalady.
Óńirde mal etin de kóptep óndirý josparlanǵan. Osy maqsatta oblysta úsh iri bordaqylaý alańy salynýy tıis. Solardyń biri Qyzyljar aýdanynda iske qosyldy. Taǵy ekeýi Ýálıhanov jáne Aqjar aýdandarynda salynyp jatyr. Olar 13 myń basqa shaqtalǵan. Joba aıasynda asyl tuqymdy mal ákelindi.
