SQO aımaqaralyq yntymaqtastyq forýmyna daıyndalyp jatyr
PETROPAVL. QazAqparat - Petropavl qalasy Qazaqstan men Reseıdiń aımaqaralyq yntymaqtastyǵynyń XV forýmyna tas-túıin daıyn. Qarashanyń 7-10 aralyǵynda oblys ortalyǵyndaǵy barlyq qyzmetter kúsheıtilgen tártipte jumys isteıdi, dep habarlaıdy QazAqparat.
Forýmǵa kelgen qonaqtarǵa joǵary dárejede qyzmet kórsetýge daıyn otyrǵandardyń biri - Soltústik Qazaqstan oblystyq Jedel medıtsınalyq kómek ortalyǵy. Mańyzdy sharaǵa ázirlikti áriden bastaǵan olar osy aralyqta dárigerlerdi biliktilikti arttyrý kýrstarynan, jumysshylardy attestatsııadan ótkizgen.
Qazir oblystyq jedel medıtsınalyq kómek ortalyǵy qyzmetkerleri kúnine 300-ge deıin shaqyrtýǵa baryp, turǵyndarǵa alǵashqy kómek kórsetip júr. Forým kúnderi bul kórsetkish artýy múmkin. Sebebi mańyzdy sharaǵa qatysýǵa syrttan myńǵa jýyq adam keledi dep kútilýde. Jedel járdem qyzmeti bul kúnderi kúsheıtilgen tártipte jumys istemek.
Qazir Petropavl qalasy boıynsha shaqyrtýlarǵa 19 arnaıy avtokólik shyǵady. Forým aldynda olardyń qataryna taǵy 3 ÝAZ jáne eki reanımobıl qosyldy. Ortalyq qyzmetkerleriniń aıtýynsha, 5 jańa mashınany satyp alýǵa oblystyq bıýdjetten 57 mln teńge bólindi.
«Reanımobılder barlyq qajetti medıtsınalyq qurylǵylarmen: ottegi balondarymen, defıbrılıator, ókpeni jasandy jeldetý apparaty, kardıograftarmen jabdyqtalǵan. Forým ótkennen keıin bul tehnıka oblys turǵyndarynyń ıgiligine qyzmet etetin bolady», deıdi SQO Jedel medıtsınalyq kómek ortalyǵy bas dárigeriniń orynbasary Vera Vovk.
Jedel járdem ortalyǵynyń barlyq mamandary bul kúnderi kezeksiz jumys isteıdi. Oǵan qosa, is sharalar ótkiziletin nysandarda dárigerler kezekshilik etedi.
Aqerke Qabykeeva
